ఏపీలో ఎన్నికల ప్రచారం జోరుగా సాగుతోంది. సీఎం చంద్రబాబు, వైసీపీ అధినేత వైఎస్ జగన్ పోటాపోటీగా ప్రచారం నిర్వహిస్తున్నారు. అభ్యర్థుల ఎంపికలో బిజీగా ఉన్న పవన్ కల్యాణ్ త్వరలోనే పూర్తిస్థాయిలో ప్రజాక్షేత్రంలోకి దిగబోతున్నారు. అలాగే వీరికి తోడు కేఏ పాల్ ప్రజాశాంతి పార్టీ సైతం ఎన్నికల బరిలో దిగుతోంది. పశ్చిమ గోదావరి జిల్లాలోని నరసాపురం లోక్‌సభ స్థానం నుంచి తాను పోటీచేస్తానని కేఏ పాల్ అధికారికంగా ప్రకటించారు. అయితే అదే స్థానంలో జనసేన తరపున పవన్ కల్యాణ్ సోదరుడు నాగబాబు బరిలోకి దిగుతున్న విషయం తెలిసిందే.
తాజాగా పశ్చిమగోదావరి జిల్లాలో నిర్వహించిన పాస్టర్ల సమావేశంలో ఆయన మాట్లాడుతూ, నర్సాపురం లోక్ సభ స్థానం నుంచి ఎన్నికల బరిలోకి దిగుతున్నానని… దమ్ముంటే పవన్ కల్యాణ్, నాగబాబు తన విజయాన్ని అడ్డుకోవాలని సవాల్ విసిరారు. పవన్, జగన్, చంద్రబాబులకు ఓటు వేయరాదని… వారంతా సీట్లను అమ్ముకుని, రాష్ట్రాన్ని దోచుకుంటారని విమర్శించారు. ఇదిలావుండగా జనసేన అధినేత పవన్ కల్యాణ్‌కు డ్యాన్స్ చేయడం రాదని ప్రజాశాంతి పార్టీ అధినేత కేఏ పాల్ ఎద్దేవా చేశారు. అంతేకాదు, వేదికపై పవన్ కల్యాణ్ స్టెప్పులు వేశారు. చిరంజీవితో పోల్చితే పవన్‌కు డ్యాన్స్ చేయడం రాదని అన్నారు. ఈ వీడియో ప్రస్తుతం వైరల్‌గా మారింది.
