టాలీవుడ్‌లోని కొంతమంది హీరోలకు ఓ అలవాటుంది. సినిమా హిట్‌ అవగానే కొన్ని రోజులు హటాత్తుగా మాయమౌతుంటారు. ఒక్కోసారి అలవాటుగా కూడా వెళ్తుంటారు. ఇంతకీ మన హీరోలకున్న ఆ అలవాటే విదేశాలకు ట్రిప్ కు వెళ్ళడం. ఇందులో ప్రిన్స్‌ మహేష్ బాబు ముందు వరుసలో ఉంటాడు. సినిమా హిట్‌ అయినా..ప్లాప్‌ అయినా మహేష్ ఒక్కసారి ఫిక్సైయ్యాడంటే తన మాట తనే వినడు. ఇక చిన్న హీరోలు కూడా ఇదే బాటలో ఉన్నారు. అయితే..లేటెస్ట్ గా యంగ్‌ టైగర్‌ ఎన్టీఆర్ కూడా టూర్‌ లిస్ట్‌ లో చేరిపోయాడు.
ఎన్టీఆర్ ఇప్పటివరకూ విదేశాల్లో టూర్‌ వెళ్ళిన దాకలాల్లేవ్‌. సినిమా హిట్‌ ఐనా..ప్లాప్‌ అయినా మరో సినిమాలకు కమిట్ అయ్యే ఎన్టీఆర్, ఈ సారి మాత్రం రూటు మార్చాడు. కారణం ‘జై లవకుశ’ ‘బిగ్ బాస్’ షో అనే చెప్పక తప్పదు.
‘జై లవ కుశ’ సినిమా నిర్మాణ వ్యయం పెరిగిపోకూడదనే ఉద్దేశంతో, ఎంతమాత్రం గ్యాప్ లేకుండా ఎన్టీఆర్ ఆ సినిమాను పూర్తి చేశాడు. అనుకున్న సమయానికి ఆడియెన్స్‌ ముందుకు వచ్చిన ఈ సినిమా భారీ సక్సెస్‌నందుకుంది. ఒక వైపు ఈ సినిమా సెట్స్ పై ఉండగానే, మరో వైపు ‘బిగ్ బాస్’ షోకు ఎన్టీఆర్ హోస్ట్ గా వ్యవహరించాడు. దాంతో యంగ్‌ టైగర్‌ కి తీరిక లేకుండా పోయింది.
ఇప్పుడు ఇటు సినిమా… అటు ‘బిగ్ బాస్’ షో సక్సెస్ ని ఎన్టీఆర్ ఎంజాయ్‌ చేస్తున్నాడు. ఇక త్రివిక్రమ్ తో సినిమాకి కమిట్ అయింది తెలిసిందే. ఆ సినిమా కోసం సెట్స్ పైకి వెళ్లడానికి 3 నెలల సమయం వుంది. అందువలన టూర్‌ కి ఫిక్స్‌ అయ్యాడు ఎన్టీఆర్. ఫ్యామిలీతో కలిసి సరదాగా గడపడానికి ఇటీవలే యూరప్ వెళ్ళాడు. నెల రోజుల పాటు యూరప్ లోని పలు ప్రాంతాల్లో ఎన్టీఆర్ ఫ్యామిలీ పర్యటించనున్నట్టు సమాచారం.
ఇకపోతే రాజమౌళితో కూడా ఎన్టీఆర్ మూవీ ఉందన్న విషయం తెలిసిందే. ఎన్టీఆర్, రామ్‌ చరణ్‌లతో జక్కన్న మల్టీస్టారర్ ప్లాన్‌ చేస్తున్నాడు. మరి యూరప్ ట్రిప్‌లో ఉన్న ఎన్టీఆర్ తిరిగొచ్చాక ఎవరి ప్రాజెక్ట్ ని స్టార్ట్‌ చేస్తాడన్నదే తేలాల్సి ఉంది. జక్కన్న సినిమా అంటే డీవియేషన్లకు అవకాశముండదు. పూర్తిగా ఆ సినిమాకే డెడికేట్ అవ్వాలి.
ఇక త్రివిక్రమ్ – ఎన్టీఆర్ సినిమా విషయానికొస్తే..వీరి సినిమాకు సంబంధించిన షూటింగ్‌ లాంఛనంగా ఇటీవలే ప్రారంభమైంది. కానీ త్రివిక్రమ్ మాత్రం తన మిత్రుడు పవన్‌ కళ్యాణ్‌తో చేస్తున్న ‘అజ్ఞాత వాసి’ చిత్రంపైనే ఎక్కువ దృష్టి పెడుతున్నట్లు తెలుస్తుంది. అది పూర్తయ్యాకే ఎన్టీఆర్‌తో సినిమా మొదలు పెడతాడని టాక్‌. ఏది ఏమైనా ఇప్పుడు యూరప్ ట్రిప్ లో ఉన్న ఎన్టీఆర్ ఎవరి సినిమాతో కమిట్ అవుతాడో ఇప్పటివరకైతే సస్పెన్సే. ఒక రకంగా ఎన్టీఆర్ కూడా ఈ విషయంపై కాస్త కన్ఫూజ్న్‌లోనే ఉన్నాడేమో.
