దిల్ రాజు ప్రొడ‌క్ష‌న్స్ బ్యాన‌ర్‌పై రూపొందుతోన్న తాజా చిత్రం ‘జనక అయితే గనక’. శిరీష్ స‌మ‌ర్ప‌ణ‌లో హర్షిత్ రెడ్డి, హ‌న్షిత ఈ సినిమాను నిర్మించారు. వెర్స‌టైల్ యాక్ట‌ర్‌ సుహాస్ హీరోగా న‌టించిన ఈ చిత్రాన్ని సందీర్ రెడ్డి బండ్ల డైరెక్ట్ చేశారు. సెప్టెంబ‌ర్ 7న ఈ సినిమా గ్రాండ్ రిలీజ్ కానుంది. హీరో సుహాస్ పుట్టినరోజు సందర్భంగా సోమవారం ఈ సినిమా నుంచి ‘నా ఫేవరేట్ నా పెళ్లాం’ సాంగ్‌ను లాంచ్ చేశారు. ఈ కార్య‌క్ర‌మంలో
సంగీత ద‌ర్శ‌కుడు విజ‌య్ బుల్గానిన్ మాట్లాడుతూ ‘‘‘జనక అయితే గనక’ సినిమాలో నాకు అవ‌కాశం ఇచ్చిన మా నిర్మాత‌లు హర్షిత్, హ‌న్షిత మేడ‌మ్‌కు థాంక్స్. అలాగే మంచి సంద‌ర్భాన్ని క్రియేట్ చేసి నాతో మంచి సంగీతాన్ని రాబ‌ట్టుకున్న మా డైరెక్ట‌ర్ సందీప్‌గారికి కూడా ఈ సందర్భంగా థాంక్స్ చెప్పుకుంటున్నాను. నా ఫేవరేట్ హీరోస్‌లో ఒక‌రైన సుహాస్‌గారికి హ్యాపీ బ‌ర్త్ డే. దిల్‌రాజుగారి ఆఫీసులోకి ఎప్పుడెప్పుడు వ‌ద్దామా అని ఎదురు చూశాను. ఇన్నాళ్లకు ఆ క‌ల నేర‌వేరింది.. ఆయ‌న‌కు థాంక్స్’’ అన్నారు.
పాట‌ల ర‌చ‌యిత కృష్ణ‌కాంత్ మాట్లాడుతూ ‘‘దిల్‌రాజుగారు మంచి కంటెంట్ సినిమాల‌ను ఎప్పుడూ ప్రోత్స‌హిస్తుంటారు. ఆయ‌న ప్రొడ్యూస్ చేయ‌క‌పోయినా, ఏదో ఒక రూపంలో ఆయ‌న కొత్త త‌ర‌హా సినిమాల‌ను ఎంక‌రేజ్ చేస్తుంటారు. బలగం సినిమాతో కంటెంట్ ఈజ్ కింగ్ అని న‌మ్మి, వారి వార‌సుల‌ను ఇండ‌స్ట్రీకి ప‌రిచ‌యం చేశారు. ‘జనక అయితే గనక’ సినిమాను కూడా ఓ కొత్త కంటెంట్‌తో రూపొందించారు. మున్ముందు సినిమా క‌థేంటో కూడా ద‌ర్శ‌కుడు చెప్పే ప్ర‌య‌త్నం చేస్తారు. ఇప్ప‌టి వ‌ర‌కు రాని యూనిక్ పాయింట్‌తో ‘జనక అయితే గనక’ సినిమా రూపొందింది. సంద‌ర్భానుసార‌మే ఇందులో పాటలుంటాయి. విజ‌య్ బుల్గానిన్ మంచి సంగీతాన్ని అందించారు. సినిమాను పెద్ద హిట్ చేస్తార‌ని న‌మ్ముతున్నాం’’ అన్నారు.
హీరోయిన్ సంగీర్తన మాట్లాడుతూ ‘‘‘జనక అయితే గనక’లో నా వ‌న్ ఆఫ్ ది ఫేవరేట్ సాంగ్ ఇది. నాపై న‌మ్మ‌కంతో నాకు అవ‌కాశం ఇచ్చిన దిల్ రాజుగారికి, డైరెక్ట‌ర్ సందీప్‌గారికి, హీరో సుహాస్, నిర్మాత‌లు హ‌న్షిత, హ‌ర్షిత్‌గారికి థాంక్స్’’ అన్నారు.
చిత్ర ద‌ర్శ‌కుడు సందీప్ మాట్లాడుతూ ‘‘కొత్త టాలెంట్‌ను న‌మ్మి ఎంక‌రేజ్ చేసేవాళ్ల‌లో రాజుగారిని మించిన‌వాళ్లు లేరు. ఒక బొమ్మ‌రిల్లు, ఒక ఆర్య, ఒక బలగం అయినా చేయ‌గ‌ల ఏకైక ప్రొడ్యూస‌ర్ రాజుగారే. నేను దాదాపు ఏడేళ్లుగా ఇదే సంస్థ‌లో ప‌ని చేస్తున్నాను. ఇంత మంచి అవ‌కాశం ఇచ్చిన ఆయ‌న‌కు థాంక్స్. అడుగులు వేసేవాళ్లు న‌డ‌వ‌గ‌ల‌రు అని న‌మ్మి అవ‌కాశం ఇచ్చిన నిర్మాత దిల్‌రాజుగారికి మ‌న‌స్ఫూర్తిగా ధ‌న్య‌వాదాలు తెలియ‌జేసుకుంటున్నాను. హ‌ర్షిత్‌గారు ముందు లైన్ విని న‌మ్మి రాజుగారి ద‌గ్గ‌ర‌కు తీసుకెళ్లాం. నా ఫస్ట్ హీరో సుహాస్, హీరోయిన్ సంగీర్తన. స‌క్సెస్‌ఫుల్ టీమ్ నన్ను స‌క్సెస్ చేయ‌టానికి ముందుకు వ‌చ్చినందుకు థాంక్స్’’ అన్నారు.
హీరో సుహాస్ మాట్లాడుతూ ‘‘ముందు ఈ స్టోరీని నాకు వినిపించిన హ‌ర్షిత‌న్న, హ‌న్షితగారికి థాంక్స్. చాలా మంచి స్టోరీ. మా అంద‌రికీ స‌పోర్ట్‌గా నిలుస్తూ వ‌చ్చిన దిల్‌రాజుగారికి పెద్ద థాంక్స్. మా డైరెక్ట‌ర్ సందీప్‌గారు జీవితంలో మ‌ర‌చిపోలేని సినిమానిచ్చారు. మా హీరోయిన్ సంగీర్తన సినిమా త‌ర్వాత అంద‌రికీ న‌చ్చేస్తుంది మంచి సంగీతాన్నిచ్చిన విజ‌య్ బుల్గానిన్, రాసిన కెకెగారు స‌హా అంద‌రికీ థాంక్స్’’ అన్నారు.
నిర్మాత దిల్‌రాజు మాట్లాడుతూ ‘‘సుహాస్‌కు ముందుగా హ్యాపీ బ‌ర్త్ డే. తండ్రికి ఉండే క‌ష్టాల‌ను అంద‌రం చూసే ఉంటాం. ప్ర‌తీ ఇంట్లో ఉండేదే. హ్యాపీగా ఉండే క‌ష్టాలు. జనక అయితే గనక కాన్సెప్ట్ గురించి సందీప్ చెప్పిన‌ప్పుడు సినిమా చేద్దామ‌ని అన్నాను. త‌ర్వాత త‌ను ప్ర‌శాంత్ వ‌ర్మ, ప్ర‌శాంత్ నీల్ ద‌గ్గ‌ర రైట‌ర్‌గా జాయిన్ అయ్యాడు. వ‌ర్క్ చేశాడు. ప్ర‌శాంత్ కూడా కాన్సెప్ట్ విని బాగుంద‌న‌టంతో స్క్రిప్ట్ రెడీ చేశాం. సుహాస్ కంటే ముందు చాలా మంది ఈ క‌థ‌ను విన్నారు. అంద‌రూ ఎగ్జ‌యిట్ అయ్యారు. కానీ అమ్మో! మేం చేస్తే ఎలా ఉంటుందో అని అన్నారు. బలగం రిలీజ్ త‌ర్వాత నేనే ఓ రోజు సందీప్, హ‌ర్షిత్‌ల‌ను పిలిచాను. సుహాస్‌తో చేస్తే బావుంటుంద‌ని చెప్పాను. త‌నైతే కథ‌తో రీచ్ అవుతాడ‌నిపించిందన్నాను. వెంట‌నే వాళ్లు కూడా బావుంటుంద‌న్నారు. మంచి కాన్సెప్ట్‌తో సినిమాలు వ‌చ్చి ఆడుతున్న‌ప్పుడు మాకొక కిక్ వ‌స్తుంది. అలాంటి స్క్రిప్టే ఇది. మిడిల్ క్లాస్ అబ్బాయి.. త‌నకొచ్చే జీతంతో హ్యాపీగా ఉంటాడు. పెళ్లి చేసుకున్న త‌ర్వాత పిల్ల‌లు వ‌ద్ద‌నుకుంటాడు. ఎందుకు పిల్ల‌లు వ‌ద్ద‌నుకుంటున్నావ‌ని ఎవ‌రైనా అడిగితే అంద‌రికీ లెక్కలు చెప్పి నోరు మూయిస్తుంటాడు. ఈరోజుల్లో ఉన్న జ‌న‌రేష‌న్‌లో డ‌బ్బులు అవ‌స‌ర‌మే, ఎమోష‌న్స్ కూడా అవ‌స‌ర‌మే. డైరెక్ట‌ర్ సందీప్ త‌న రియ‌ల్ లైఫ్‌లో చూసిన ఇన్సిడెన్స్‌ను బేస్ చేసుకుని క‌థ‌ను త‌యారు చేశాడు. దీన్ని హ్యుమ‌ర‌స్‌గా, మంచి కాన్సెప్ట్‌తో సినిమా చేశారు. సినిమా చూశాను. చాలా రోజుల త‌ర్వాత ఓ మంచి సినిమాను మీరు చూడ‌బోతున్నార‌నే న‌మ్మ‌కంతో ఉన్నాం. సెప్టెంబ‌ర్ 7న సినిమాను రిలీజ్ చేయ‌బోతు్నాం. క‌మిటీ కుర్రోళ్ళు, ఆయ్ సినిమాల‌ను ప్రేక్ష‌కులు ఎలాగైతే ఫ్రెష్‌గా ఫీల‌య్యారో జనక అయితే గనక సినిమాను అలాగే ఫీల్ అవుతారు. కావాల్సినంత హ్యుమ‌ర్ ఉంటుంది. నాన్ స్టాప్ ఎంట‌ర్‌టైన‌ర్ మూవీ ఇది. సుహాస్, సంగీర్తన జంట ఆన్ స్క్రీన్ చ‌క్క‌గా ఉంటుంది. మిడిల్‌క్లాస్ అబ్బాయిగా సుహాస్ చ‌క్క‌గా న‌టించాడు. ల‌వ్ అంటే చాలా పాట‌లను మనం చూశాం. భార్య ప్రేమ గురించి గొప్ప‌గా చెప్ప‌టానికి సందీప్‌కు అవ‌కాశం ద‌క్కింది. దాన్నే ఈసినిమాలో పాట‌గా రూపొందించారు. ప్ర‌తీ భ‌ర్త త‌న భార్య‌కు డేడికేట్ చేయాల్సిన పాటే ‘నా ఫేవరేట్ నా పెళ్లాం’. సెప్టెంబ‌ర్ 7న ‘జనక అయితే గనక’ సినిమాతో మీ అందరి ముందుకొస్తాం’’ అన్నారు.
Also Read:సీఎం రేవంత్‌ రెడ్డితో గవర్నర్ దత్తాత్రేయ భేటీ
