భారత ప్రధాన మంత్రి నరేంద్ర మోదీ మరియు ఇజ్రాయెల్ ప్రధాన మంత్రి బెంజమిన్ నెతాన్యహు మధ్య నేడు కీలకమైన టెలిఫోన్ సంభాషణ జరిగింది. రెండు దేశాల మధ్య కొనసాగుతున్న వ్యూహాత్మక బంధాలు, రక్షణ సహకారం, ప్రాంతీయ పరిస్థితులు వంటి ప్రధాన అంశాలు ఈ చర్చల్లో ప్రాధాన్యంగా నిలిచాయి.
ఈ సందర్భంగా పశ్చిమ ఆసియాలో నెలకొన్న తాజా భద్రతా పరిస్థితులను నెతాన్యహు మోదీకి వివరించారు. హమాస్తో కొనసాగుతున్న ఘర్షణలు, ప్రాంతీయ శాంతి స్థాపనకు ఎదురవుతున్న సవాళ్లు, రాబోయే రోజుల్లో ఇజ్రాయెల్ తీసుకోబోతున్న విధానాలను ఆయన వివరించారు. ప్రాంతంలో స్థిరత్వం కోసం భారత్ పోషిస్తున్న సానుకూల పాత్రను నెతాన్యహు అభినందించారు.
ఇద్దరు నాయకులు భారత్–ఇజ్రాయెల్ వ్యూహాత్మక భాగస్వామ్యాన్ని మరింత బలోపేతం చేయాల్సిన అవసరాన్ని గుర్తించారు. ముఖ్యంగా రక్షణ, సైబర్ సెక్యూరిటీ, గూఢచారి సమాచార మార్పిడి, సాంకేతిక రంగాల్లో కలిసి పనిచేసేందుకు అంగీకరించారు. ఉగ్రవాదం ప్రపంచవ్యాప్తంగా మానవత్వానికి తీవ్రమైన బెడదగా మారిందని, దీనిపై ఉక్కుపాదం మోపేందుకు వెనక్కి తగ్గే ప్రసక్తే లేదని ఇద్దరు ప్రధానిలు స్పష్టంగా పేర్కొన్నారు.
అంతర్జాతీయ వేదికల్లో పరస్పర మద్దతు, శాంతి–భద్రతల కోసం సమిష్టి ప్రయత్నాల ప్రాధాన్యాన్ని ఇద్దరూ పునరుద్ఘాటించారు. ఈ సంభాషణ ద్వారా రెండు దేశాల మధ్య ద్వైపాక్షిక సహకారం మరింత వేగంగా ముందుకు సాగే అవకాశం కనిపిస్తోంది.
Also Read:పంచాయతీ ఎన్నికల పోలింగ్..అప్డేట్