ఐపీఎల్ 2026లో రోహిత్ శర్మ మళ్లీ ‘ఇంపాక్ట్ ప్లేయర్’గా ఆడతాడా అనే అంశంపై కోచ్ మహేళ జయవర్దనే స్పందించారు. గత సీజన్లో ముంబై ఇండియన్స్ రోహిత్ను ఇంపాక్ట్ ప్లేయర్గా ఉపయోగించడంపై తీవ్ర విమర్శలు వచ్చాయి. అయితే, దానికి కారణం అతనికి ఉన్న చిన్నపాటి గాయాలేనని జయవర్ధనే తెలిపారు.
గత ఏడాది రోహిత్కు కొన్ని ఫిట్నెస్ సమస్యలు ఉండటంతో అతని వర్క్లోడ్ను జాగ్రత్తగా మేనేజ్ చేయాల్సి వచ్చిందని చెప్పారు. అయితే, ఈ సీజన్లో రోహిత్ పూర్తిగా ఫిట్గా ఉన్నాడని, ఎక్కువ సమయం మైదానంలో ఉండేలా చూసే ఉద్దేశ్యం తమదని వెల్లడించారు.
గత సీజన్లో అతని పరిస్థితిని బట్టి నిర్ణయం తీసుకున్నాం. కానీ ఈసారి అతన్ని ఎక్కువగా మైదానంలో ఉంచాలనుకుంటున్నాం అని జయవర్ధనే మీడియాతో మాట్లాడుతూ చెప్పారు. 38 ఏళ్ల రోహిత్ ప్రస్తుతం మంచి ఫిట్నెస్తో కనిపిస్తున్నాడు. రాబోయే వన్డే వరల్డ్ కప్ (దక్షిణాఫ్రికా, జింబాబ్వే, నమీబియా) కోసం కూడా సిద్ధమవుతున్నాడు.
అయితే, మ్యాచ్ పరిస్థితుల ఆధారంగా కొన్నిసార్లు రోహిత్ను మళ్లీ ఇంపాక్ట్ ప్లేయర్గా ఉపయోగించే అవకాశాన్ని కూడా జయవర్ధనే పూర్తిగా ఖండించలేదు. జట్టులో ఎక్కువ మంది ఆల్రౌండర్లు ఉండటంతో కెప్టెన్కు కొన్ని వ్యూహాత్మక నిర్ణయాలు తీసుకోవాల్సి వస్తుందని అన్నారు.
ప్రస్తుతం జట్టులో బౌలింగ్ చేయని ప్రధాన ఆటగాళ్లు రోహిత్, సూర్యకుమార్ యాదవ్ మాత్రమే ఉన్నారని పేర్కొన్నారు. అందువల్ల ప్రత్యర్థి జట్టు, మ్యాచ్ పరిస్థితులను బట్టి ఈ నిర్ణయం తీసుకునే అవకాశం ఉందని సూచించారు.
Also Read:మొక్కజోన్న రైతుల కోసం బీఆర్ఎస్ ఆందోళన