కుటుంబ చిత్రాల‌కు పెట్టింది పేర‌యిన వెల్ఫేర్ క్రియేష‌న్స్ బ్యాన‌ర్. ఎన్నో విజ‌య‌వంత‌మైన చిత్రాల‌ను తెలుగు ప్రేక్ష‌కుల‌కు అందించిన ఈ బ్యాన‌ర్ ఇప్పుడు ఇంకేంటి నువ్వే చెప్పు అంటూ మ‌రో చిత్రంతో ప్రేక్ష‌కుల ముందుకు వ‌స్తుంది. కొత్త టాలెంట్ ను సినీ ప‌రిశ్ర‌మ‌కు ప‌రిచ‌యం చేయ‌డంలో వెల్ఫేర్ క్రియేష‌న్స్ ఎప్పుడూ ముందుంటుంది. ఓ కొత్త ద‌ర్శ‌కునికి, ఒక కొత్త సంగీత ద‌ర్శ‌కునికి అవ‌కాశం క‌ల్పిస్తూ, నూత‌న న‌టీనటులతో డాక్ట‌ర్ మ‌ళ్ల విజ‌య్ ప్ర‌సాద్ నిర్మించిన ఈ చిత్ర ఆడియో డిసెంబ‌ర్ 10 సాయంత్రం వైజాగ్ ఆర్కే బీచ్ లో అట్టహాసంగా జ‌రిగింది.
ఈ కార్య‌క్ర‌మానికి ముఖ్య అతిధిగా విచ్చేసిన సుమ‌న్ మాట్లాడుతూ, విశాఖ సాగర తీరాన ఇలా ఈ కార్య‌క్ర‌మం నిర్వహించ‌డం, చాలా సంతోషంగా ఉంద‌ని.. సినిమా కోసం పని చేసిన ప్ర‌తీ ఒక్క‌రికీ ఆల్ ది బెస్ట్ అని చెప్పారు. ప్రొఫెస‌ర్ నాగేశ్వ‌ర రెడ్డి మాట్లాడుతూ, నిర్మాత విజ‌య్ ప్ర‌సాద్ నాకు బాగా తెలుసు. ఆయ‌న ప్రేక్ష‌కుల‌కు అందించిన సినిమాలన్నీ ఎంతో పెద్ద విజయాన్ని సాధించాయి. ఈ చిత్రం కూడా అలాంటి విజయాన్ని సాధించాల‌ని ఆశిస్తున్నా అన్నారు.
డైర‌క్ట‌ర్ శివశ్రి మాట్లాడుతూ, ప్రొడ్యూస‌ర్ ఈ సినిమాకు కావాల్సిన ప్ర‌తీ దాన్ని చాలా చ‌క్క‌గా స‌మ‌కూర్చారు. ఆయ‌న ప్ర‌తీ ఒక్క‌రికీ బంధువు. సినిమాకు ప‌నిచేసిన న‌టీన‌టులు, సాంకేతిక నిపుణులంద‌రూ ఎంతో కష్ట‌ప‌డ్డారు.ఇప్ప‌టి వ‌ర‌కు నా షార్ట్ ఫిల్మ్స్ ను ఆద‌రించిన ప్ర‌తీ ఒక్క‌రికీ స్పెషల్ థ్యాంక్స్ అన్నారు. హీరోయిన్ అక్షిత మాట్లాడుతూ, త‌న‌తో ప‌నిచేసిన న‌టీన‌టుల‌కు, త‌న‌కు ఈ అవ‌కాశం ఇచ్చిన ద‌ర్శ‌క నిర్మాత‌ల‌కు థ్యాంక్స్ చెప్పారు. ఈ సినిమా త‌ప్ప‌కుండా త‌న‌కు మంచి భ‌విష్య‌త్ ను ఇస్తుంద‌ని, త‌న‌కు అవ‌కాశ‌మిచ్చిన వారికి ధన్య‌వాదాలు తెలిపారు హీరో సన్ని. వికాస్ అందించిన సంగీతం ఈ సినిమాకు కీల‌క‌మ‌ని చెప్పారు.
నిర్మాత మ‌ళ్ల విజ‌య‌ప్ర‌సాద్ మాట్లాడుతూ, మంచి సినిమాల‌ను నిర్మించేదిగా పేరున్న త‌మ బ్యాన‌ర్ విలువ త‌గ్గ‌కుండా ఈ సినిమా ఉంటుందన్నారు. ఆడియో లాగానే ఈ సినిమా ను కూడా ఆద‌రిస్తార‌ని ఆశిస్తున్నామ‌న్నారు. సినిమా మొద‌లు పెట్టిన ద‌గ్గ‌రి నుంచి ఏ ఒక్క రోజు కూడా ఆల‌స్యం కాకుండా ప్ర‌తీ ఒక్క‌రూ ఎంతో క‌ష్ట‌ప‌డి చేశారు. ఈ సినిమా త్వరలొనే ప్రేక్ష‌కుల ముందుకు రానుంది. పెద్ద సినిమాలు ఉన్న‌ప్ప‌టికీ, ఈ సినిమా మీద న‌మ్మ‌కంతో ఈనెలలొనే సినిమాను ముందుకు తీసుకొస్తున్నాం..సినిమా సందేశాత్మ‌కంగా ఉంటుంది.వికాస్ అందించిన సంగీతం సినిమాను మ‌రో స్థాయికి తీసుకెళ్తుంది. సినిమాను ఒక‌సారి చూస్తే మ‌ళ్లీ మ‌ళ్లీ చూడాల‌నిపించేలా ఉంటుందిఅన్నారు.
