భారత్-వెస్టిండీస్‌ మధ్య ఆదివారం జరిగిన రెండో వన్డేలో టీమ్‌ఇండియా బోణి కొట్టింది. అటు బ్యాటింగ్.. ఇటు బౌలింగ్‌లో సత్తా చాటిన భారత్.. ఏకంగా 105 పరుగుల తేడాతో విండీస్‌ను చిత్తు చేసింది. ఐదు వన్డేల సిరీస్‌లో 1-0తో ముందంజలో నిలిచింది భారత్. 311 పరుగుల భారీ లక్ష్యంతో బరిలోకి దిగిన వెస్టిండీస్‌.. భారత్ బౌలర్ల దెబ్బకు నిర్ణీత ఓవర్లలో ఆరు వికెట్లు కోల్పోయి 205 పరుగులు మాత్రమే చేసింది.
టాస్ ఓడి మొదట బ్యాటింగ్ చేసిన భారత్‌కు ఓపెనర్లు అజింక్యా రహానే(104 బంతుల్లో 103; 10 ఫోర్లు, 2 సిక్సర్లు) శతకంతో, ధావన్‌ (59 బంతుల్లో 63; 10 ఫోర్లు), కోహ్లీ(66 బంతుల్లో 87; 4 ఫోర్లు, 4 సిక్సర్లు) అర్ధ సెంచరీలతో రాణించడంతో భారత్ 43 ఓవర్లలో ఐదు వికెట్లకు 310 పరుగుల భారీ స్కోరు సాధించింది. 39 ఓవర్లకు భారత్ స్కోరు 260/4. అప్పటికే భారత్ మెరుగైన స్థితిలో ఉండటంతో మరో ఎండ్‌లో ఉన్న విరాట్‌ బ్యాట్‌ ఝళిపించాడు. బౌండరీలు, సిక్సర్లతో చెలరేగుతూ స్కోరు బోర్డును పరుగులెత్తించాడు. 285 పరుగుల వద్ద జోసెఫ్‌ బౌలింగ్‌లో భారీ షాట్‌కు ప్రయత్నించి కోహ్లి ఔటవడంతో ధోనీ(13: నాటౌట్‌), జాదవ్‌ 13: నాటౌట్‌) ఆఖర్లో చెలరేగి ఆతిథ్య జట్టుకు 311 పరుగుల లక్ష్యాన్ని నిర్దేశించారు. జోసెఫ్‌కు రెండు వికెట్లు దక్కాయి. అంతకుముందు భారీ వర్షం కారణంగా మ్యాచ్‌ను 43 ఓవర్లకు కుదించారు.
భారీ లక్ష్య చేదనకు దిగిన విండీస్ కు ఆదిలోనే ఎదురు దెబ్బ తగిలింది. ఓపెనర్ పోవెల్‌ భువనేశ్వర్‌ వేసిన తొలి ఓవర్ మూడో బంతికే డకౌటయ్యాడు. ఆ తర్వత క్రీజులోకి వచ్చిన మహ్మద్‌ను కూడా భువీ డకౌట్‌గా పెవిలియన్‌కు పంపాడు. మరో ఓపెనర్ షై హోప్‌(89) ఒంటిరి పోరాటం చేయగా మిగతా బ్యాట్స్‌మెన్‌ నుంచి సహాకారం అందకపోవడంతో నిర్ణీత 43 ఓవర్లకు 6 వికెట్లు కోల్పోయి 205 పరుగులు చేసింది. ఇక భారత్ బౌలర్లలో భువీ 2, కుల్దీప్‌ యాదవ్‌ (3), అశ్విన్‌ (1) దక్కాయి. శతక వీరుడు అజింక్యా రహానేకు మ్యాన్‌ ఆఫ్ ది మ్యాచ్‌ వరించింది.
