అమల్లోకి భారత్-బ్రిటన్ ఒప్పందం!

భారతదేశ దౌత్య చరిత్రలో సరికొత్త అధ్యాయం మొదలైంది. భారత్ మరియు బ్రిటన్ (UK) దేశాల మధ్య కుదిరిన చారిత్రాత్మక ‘సమగ్ర ఆర్థిక మరియు వాణిజ్య ఒప్పందం’ (CETA) అధికారికంగా అమలులోకి వచ్చింది. ఈ స్వేచ్ఛా వాణిజ్య ఒప్పందం (FTA) వల్ల భారతీయ ఎగుమతిదారులకు ప్రపంచంలోనే అతిపెద్ద వినియోగదారుల మార్కెట్లలో ఒకటైన బ్రిటన్‌కు మార్గం సులువు కానుంది. అదే సమయంలో, విదేశీ బ్రాండ్లను ఇష్టపడే భారతీయ వినియోగదారులకు బ్రిటన్ నుండి దిగుమతి అయ్యే పలు ప్రీమియం ఉత్పత్తులు తక్కువ ధరలకే లభించనున్నాయి.

ఈ ఒప్పందం ద్వారా రెండు దేశాల మధ్య పెట్టుబడులు పెరగడమే కాకుండా, ఉపాధి అవకాశాలు సృష్టించబడతాయని, భారత తయారీ (Manufacturing) మరియు సేవా (Services) రంగాలు సరికొత్త పుంతలు తొక్కుతాయని ఆర్థిక నిపుణులు విశ్లేషిస్తున్నారు.

భారతదేశంలో టారిఫ్‌లు (దిగుమతి సుంకాలు) దశలవారీగా తగ్గనున్న నేపథ్యంలో, బ్రిటన్ నుండి వచ్చే పలు లగ్జరీ మరియు ప్రీమియం ఉత్పత్తుల ధరలు తగ్గనున్నాయి.

ఆల్కహాల్ మరియు పానీయాలు: విదేశీ స్కాచ్ విస్కీ (Scotch Whisky), జిన్ (Gin).

ఆటోమొబైల్స్: బ్రిటన్‌కు చెందిన ప్రీమియం కార్లు మరియు లగ్జరీ మోటార్ సైకిళ్లు.

జీవనశైలి & ఆహారం: అంతర్జాతీయ బ్రాండెడ్ కాస్మెటిక్స్ (సౌందర్య సాధనాలు), చాక్లెట్లు, బిస్కెట్లు మరియు కొన్ని రకాల ఆహార పదార్థాలు.

వైద్యరంగం: అధునాతన మెడికల్ డివైసెస్ (వైద్య పరికరాలు).

గమనిక: ఈ ధరల తగ్గింపు రాత్రికి రాత్రే జరగదు. ఉదాహరణకు, బ్రిటిష్ కార్లపై ప్రస్తుతం ఉన్న 110 శాతం వరకు ఉన్న భారీ దిగుమతి సుంకాన్ని కోటా పద్ధతిలో రాబోయే కొన్నేళ్లపాటు క్రమంగా తగ్గిస్తారు. దీనివల్ల స్థానిక భారతీయ ఆటోమొబైల్ పరిశ్రమకు మరియు అభివృద్ధి చెందుతున్న ఈవీ (EV) రంగానికి ఎలాంటి నష్టం జరగకుండా ప్రభుత్వం రక్షణ చర్యలు కూడా తీసుకుంది.

ఈ ఒప్పందం వల్ల అతిపెద్ద ప్రయోజనం భారతీయ వ్యాపారవేత్తలకే కలగనుంది. బ్రిటన్‌కు భారత్ ఎగుమతి చేసే వస్తువులలో దాదాపు 99 శాతం ఉత్పత్తులకు సున్నా-సుంకం (Zero-Duty) లభించనుంది. దీనివల్ల బ్రిటన్ మార్కెట్లో చైనా, యూరప్ దేశాల ఉత్పత్తులతో పోలిస్తే భారతీయ వస్తువుల ధరలు తగ్గి, గట్టి పోటీని ఇవ్వగలుగుతాయి.

ముఖ్యంగా కోట్లాది మందికి ఉపాధి కల్పిస్తున్న కింది రంగాలు భారీగా లాభపడనున్నాయి..

దుస్తులు మరియు టెక్స్‌టైల్స్

తోలు వస్తువులు మరియు పాదరక్షలు

రత్నాలు మరియు ఆభరణాలు

ఇంజనీరింగ్ వస్తువులు మరియు రసాయనాలు

సముద్ర ఆహారోత్పత్తులు

ఈ పన్నుల మినహాయింపు వల్ల దేశంలోని చిన్న, మధ్య తరహా పరిశ్రమలకు (MSMEs) అంతర్జాతీయంగా విస్తరించేందుకు అద్భుతమైన అవకాశం లభిస్తుందని వాయనా ప్రెసిడెంట్ కౌశల్ సంపత్ పేర్కొన్నారు.ఈ ఒప్పందం కేవలం వస్తువులకే పరిమితం కాలేదు, సేవా రంగానికి కూడా విస్తరించింది. భారతీయ ఐటీ (IT) కంపెనీలు, ఇంజనీర్లు, కన్సల్టెంట్లు, చార్టర్డ్ అకౌంటెంట్లు మరియు ఆరోగ్య సంరక్షణ నిపుణులకు బ్రిటన్ మార్కెట్లో మరిన్ని అవకాశాలు లభిస్తాయి.

Also Read:కాపు ఉద్యమనేత ముద్రగడ ఇకలేరు..

ఐదేళ్ల లోపు అసైన్‌మెంట్లపై బ్రిటన్ వెళ్లే భారతీయ నిపుణులు ఇకపై రెండు దేశాల్లోనూ సోషల్ సెక్యూరిటీ (సామాజిక భద్రత) పన్నులు చెల్లించాల్సిన అవసరం లేదు. ఇది కంపెనీల నిర్వహణ వ్యయాన్ని భారీగా తగ్గిస్తుంది.ఈ చారిత్రాత్మక ఒప్పందం ద్వారా 2030 నాటికి ఇరు దేశాల మధ్య ద్వైపాక్షిక వాణిజ్యం దాదాపు రెట్టింపై 120 బిలియన్ డాలర్లకు చేరుకునే అవకాశం ఉందని ప్రముఖ పారిశ్రామిక సంస్థ అసోచామ్ అంచనా వేసింది.