పశ్చిమాసియాలో ఉద్రిక్త పరిస్థితులు మరింత తీవ్రమవుతున్న నేపథ్యంలో కేంద్ర ప్రభుత్వం కీలక నిర్ణయం తీసుకుంది. హోర్ముజ్ జలసంధి మీదుగా ప్రయాణించే నౌకల్లో భారతీయ నావికులను నియమించవద్దని షిప్పింగ్ కంపెనీలు, షిప్ మేనేజ్మెంట్ సంస్థలు, రిక్రూట్మెంట్ ఏజెన్సీలకు ఆదేశాలు జారీ చేసింది. ఈ ఆదేశాలు తదుపరి ఉత్తర్వులు వచ్చే వరకు అమల్లో ఉంటాయని అధికారులు తెలిపారు.
ఇటీవల హోర్ముజ్ జలసంధి పరిసరాల్లో వాణిజ్య నౌకలపై జరిగిన దాడుల్లో ఇద్దరు భారతీయ నావికులు ప్రాణాలు కోల్పోవడంతో ఈ నిర్ణయం తీసుకున్నట్లు తెలుస్తోంది. గల్ఫ్ ప్రాంతంలో భద్రతా పరిస్థితులు క్షీణించడంతో భారతీయుల ప్రాణాలను కాపాడేందుకు ముందస్తు జాగ్రత్త చర్యగా కేంద్రం ఈ ఆదేశాలు జారీ చేసింది.
భారత సముద్ర రవాణా నియంత్రణ సంస్థ (DGMA) షిప్పింగ్ సంస్థలకు పంపిన సూచనల్లో, హోర్ముజ్ జలసంధి గుండా ప్రయాణించే నౌకల్లో భారతీయ సిబ్బందిని కొత్తగా నియమించకుండా ఉండాలని స్పష్టం చేసింది. అలాగే ఇప్పటికే ఆ మార్గంలో ప్రయాణిస్తున్న నౌకలు అత్యంత అప్రమత్తంగా ఉండాలని, భద్రతా హెచ్చరికలను నిరంతరం పరిశీలిస్తూ అవసరమైన రక్షణ చర్యలు పాటించాలని సూచించింది.
Also Read:ఒకే దేశం-ఒకే ఎన్నికలు..భిన్న వాదనలు?
హోర్ముజ్ జలసంధి ప్రపంచంలోని అత్యంత కీలక సముద్ర వాణిజ్య మార్గాల్లో ఒకటి. మధ్యప్రాచ్య దేశాల నుంచి ప్రపంచానికి సరఫరా అయ్యే ముడి చమురు, సహజవాయువు రవాణాలో ఈ మార్గం కీలక పాత్ర పోషిస్తుంది. ఈ ప్రాంతంలో ఉద్రిక్తతలు పెరగడం ప్రపంచ ఇంధన సరఫరాపైనా ప్రభావం చూపే అవకాశం ఉందని నిపుణులు హెచ్చరిస్తున్నారు.
భారత ప్రభుత్వం పరిస్థితిని ఎప్పటికప్పుడు సమీక్షిస్తోందని, ప్రాంతీయ భద్రత సాధారణ స్థితికి చేరుకునే వరకు ఈ ఆంక్షలు కొనసాగనున్నాయని అధికారులు వెల్లడించారు.