ఉన్నది ఒక్కటే జిందగీ చిత్రంతో ప్రేక్షకులను ఆకట్టుకున్న హీరో రామ్. ప్రస్తుతం త్రినాధ్ రావ్ నక్కిన దర్శకత్వంలో తెరకెక్కుతున్న హలో గురూ ప్రేమ కోసమే చిత్రంలో నటిస్తున్నారు. సక్సెస్ ఫుల్ చిత్రాల నిర్మాత దిల్ రాజు సమర్పణలో ఈ చిత్రం తెరకెక్కుతుండటంతో భారీ అంచనాలు నెలకొన్నాయి. ప్రస్తుతం ఈ సినిమా షూటింగ్ హైదరాబాద్‌లో జరుగుతోంది. శరవేగంగా షూటింగ్ జరుపుకుంటుండగా హీరో రామ్, ప్రకాష్ రాజ్‌లపై కొన్ని సన్నివేశాలను చిత్రీకరిస్తున్నారు. ఈ సినిమాలో హీరో రామ్ క్యారెక్టర్‌ అండ్‌ లుక్‌ డిఫరెంట్‌గా ఉండేలా ప్లాన్‌ చేశారట దర్శకుడు త్రినాథరావు.
అక్కినేని నాగార్జున నిర్ణయం సినిమాలోని హలో గురూ ప్రేమకోసమేరా ఈ జీవితం పాట అందరికి గుర్తుండే ఉంటుంది. ఈ పాటనే టైటిల్‌గా తీసుకుని సినిమాను తెరకెక్కిస్తున్నారు. వాస్తవానికి అఖిల్ రెండో సినిమాకు ఈ టైటిల్‌నే పరిశీలించిన చివరికి హలో అని కన్ఫామ్ చేశారు.
రామ్ సరసన అనుపమ పరమేశ్వరన్‌ హీరోయిన్‌గా నటిస్తోంది. వీరిద్దరి కాంబినేషన్‌లో వస్తున్న రెండో చిత్రం ఇది. ఉన్నది ఒక్కటే జిందగీలో వీరిద్దరి కాంబినేషన్‌ అద్భుతంగా పండిన సంగతి తెలిసిందే. ఈ చిత్రానికి కధ ప్రసన్న కుమార్ బెజవాడ అందిస్తున్నారు. సాయి కృష్ణ రచనా సహకారం అందిస్తున్నారు. ప్రేమ కోసం ఏమైనా చేయొచ్చనే టైప్‌ అతను. మరి.. ప్రేమను గెలిపించుకోవడానికి ఎందాకా వెళ్లాడు?.. ఏం చేశాడు? అనేది తెలుసుకోవాలంటే కొన్నాళ్లు ఆగాల్సిందే.
