హైదరాబాద్ నగరంలో తెల్లవారుజామున కురిసిన భారీ వర్షం ప్రజలను ఇబ్బందులకు గురి చేసింది. ముఖ్యంగా సికింద్రాబాద్, బషీర్ బాగ్, అల్వాల్, జూబ్లీహిల్స్, పంజాగుట్ట, మణికొండ, ఉప్పల్ తదితర ప్రాంతాల్లో ఉదయం గంటలపాటు వర్షం కురిసింది.
భారీ వర్షపాతం కారణంగా పలు ప్రధాన రహదారులు జలమయమయ్యాయి. నీరు నిలిచిపోవడంతో వాహనదారులు తీవ్ర ఇబ్బందులు ఎదుర్కొన్నారు. కొన్ని ప్రాంతాల్లో డ్రైనేజీ వ్యవస్థ సరిగా లేకపోవడంతో లోతట్టు కాలనీలు నీటమునిగాయి. కార్యాలయాలకు, పాఠశాలలకు బయలుదేరిన ప్రజలు ట్రాఫిక్ సమస్యలతో ఆలస్యంగా గమ్యస్థానాలకు చేరుకున్నారు.
వర్షం ప్రభావంతో కొన్ని ఏరియాల్లో విద్యుత్ సరఫరాకు అంతరాయం కలిగింది. విద్యుత్ శాఖ సిబ్బంది మరమ్మతు పనులు చేపట్టి సరఫరా పునరుద్ధరించేందుకు చర్యలు తీసుకున్నారు. జీహెచ్ఎంసీ సిబ్బంది కూడా నీటిని తొలగించే పనుల్లో నిమగ్నమయ్యారు.
ఇదిలా ఉండగా, ఇవాళ కూడా నగరంలో మోస్తరు వర్షం కురిసే అవకాశం ఉందని వాతావరణ శాఖ వెల్లడించింది. ప్రజలు అవసరం లేని ప్రయాణాలు తగ్గించాలని, లోతట్టు ప్రాంతాల్లో నివసించే వారు అప్రమత్తంగా ఉండాలని అధికారులు సూచించారు. నగరంలో వర్షాల ప్రభావం మరికొన్ని రోజులు కొనసాగవచ్చని హెచ్చరించారు.
Also Read:బెంగాల్ ఓటర్లకు ప్రధాని భావోద్వేగ లేఖ