తెలంగాణ భవన్లో నిర్వహించిన మీడియా సమావేశంలో మాజీ మంత్రి, ఎమ్మెల్యే హరీష్ రావు ముఖ్యమంత్రి రేవంత్ రెడ్డిపై తీవ్రస్థాయిలో విమర్శలు గుప్పించారు. ముఖ్యమంత్రి హోదాలో ఉండి రేవంత్ రెడ్డి ఉపయోగిస్తున్న భాష సభ్య సమాజం అసహ్యించుకునే స్థాయిలో ఉందని ఆయన ఆగ్రహం వ్యక్తం చేశారు. ఈ రకమైన వికృత పదజాలం తెలంగాణ సంస్కృతికి మాయని మచ్చగా మిగిలిపోతుందని, చరిత్రలో రేవంత్ రెడ్డి ఒక “బూతుల సీఎం”గా మాత్రమే గుర్తుండిపోతారని వ్యాఖ్యానించారు.
అమెరికా పర్యటన అనంతరం సీఎం చేసిన వ్యాఖ్యలు తనను తీవ్రంగా బాధించాయని హరీష్ రావు తెలిపారు. రాజకీయాల్లో విమర్శలు సహజమేనని, కానీ ముఖ్యమంత్రి స్థాయిలో ఉండి చిల్లర మాటలు మాట్లాడటం దారుణమని అన్నారు. విలువలతో కూడిన రాజకీయాలు చేయాల్సిన వ్యక్తే ఇలా దిగజారి మాట్లాడటం రాష్ట్ర ప్రతిష్టకు భంగం కలిగిస్తోందని చెప్పారు. ఈ విషయంలో తెలంగాణ మేధావులు, బుద్ధిజీవులు మౌనం వహించడం రాష్ట్రానికి ప్రమాదకరమని హెచ్చరించారు.
కేసీఆర్ లేని తెలంగాణ ఉందా అని ప్రశ్నించిన హరీష్ రావు, నాలుగు కోట్ల మంది ప్రజల ఆకాంక్షను నిజం చేసిన వ్యక్తి కేసీఆర్ అని స్పష్టం చేశారు. రైతుబంధు ద్వారా 60 లక్షల మంది రైతుల జీవితాల్లో వెలుగులు నింపడం, 24 గంటల కరెంటు, రైతు బీమా, 2,000 రూపాయల పెన్షన్, వెయ్యి గురుకులాల ఏర్పాటు వంటి ఎన్నో సంస్కరణలు కేసీఆర్ హయాంలోనే జరిగాయని గుర్తు చేశారు. అందుకే తెలంగాణ సమాజం ఆయనను జాతిపితగా పిలుస్తోందని అన్నారు.
రెండున్నరేళ్ల రేవంత్ రెడ్డి పాలనలో ప్రజలకు చేసింది ఏమీ లేదని, పాలన వైఫల్యాలను కప్పిపుచ్చుకోవడానికే వికృత భాషను ఆశ్రయిస్తున్నారని విమర్శించారు. జాబ్ క్యాలెండర్ ఇస్తానని చెప్పి నిరుద్యోగులను మోసం చేశారని, బదులుగా నెలకు ఒక స్కామ్తో “స్కాం క్యాలెండర్” అమలు చేస్తున్నారని ఆరోపించారు. సివిల్ సప్లైస్ స్కాం నుంచి పవర్ స్కాం, సింగరేణి స్కాం వరకు వరుసగా కుంభకోణాలు జరిగాయని వివరించారు.
రైతుల అంశాలపై సీఎం ఒక్కరోజు కూడా మాట్లాడలేదని, రుణమాఫీ, రైతుబంధు, వడ్ల బోనస్ ఎగ్గొట్టి రైతులను నట్టేట ముంచారని అన్నారు. 24 గంటల కరెంటును 12 గంటలకు కుదించారని విమర్శించారు. విద్య, ఉద్యోగాలు, ఫీజు రీయింబర్స్మెంట్, పెన్షన్లు, ఉద్యోగుల సమస్యలు—ఏ అంశంపైనా సీఎం స్పందించలేదని ఆరోపించారు.
బీజేపీతో చీకటి ఒప్పందం చేసుకుని తన కుర్చీని కాపాడుకుంటున్నారని, అందుకే కాంగ్రెస్ ప్రభుత్వ అవినీతిపై కేంద్రం విచారణ జరగడం లేదని హరీష్ రావు అన్నారు. చివరగా, కేసీఆర్ పేరు పలకకుండా రేవంత్ రెడ్డి మాట్లాడలేకపోతున్నారని, ప్రజలే తగిన సమయంలో సమాధానం చెబుతారని ధీమా వ్యక్తం చేశారు.
Also Read:భారత్–అమెరికా ట్రేడ్ డీల్పై రష్యా!