పెట్రోల్లో 25% ఇథనాల్ను కలిపే ‘E25 పెట్రోల్’ వైపు వెళ్లే ఆలోచన ప్రస్తుతం పరిశీలనలో మాత్రమే ఉందని…దీని రోల్అవుట్పై ప్రభుత్వం ఇంకా ఎలాంటి నిర్ణయం తీసుకోలేదని కేంద్ర పెట్రోలియం శాఖ మంత్రి హరదీప్ సింగ్ పూరి తెలిపారు. ప్రస్తుత E20 బ్లెండ్ కంటే ముందుకు వెళ్లే విషయాన్ని పరిశీలించే ముందు.. ప్రస్తుతం జరుగుతున్న పరీక్షలు పూర్తి కావాల్సి ఉంటుందని, ఆ ఫలితాలను వాహన తయారీదారులు మరియు ఇతర భాగస్వాములతో చర్చించాల్సి ఉంటుందని పూరి న్యూఢిల్లీలో పేర్కొన్నారు.
భారతదేశంలో డిఫాల్ట్ పెట్రోల్ గ్రేడ్గా మారిన 20% ఇథనాల్ బ్లెండ్ (E20) పై తీవ్రమైన వ్యతిరేకత వస్తున్న నేపథ్యంలో మంత్రి ఈ వివరణ ఇచ్చారు. కర్ణాటక కాంగ్రెస్ నేత బి.కె. హరిప్రసాద్, ఆమ్ ఆద్మీ పార్టీ కన్వీనర్ అరవింద్ కేజ్రీవాల్ వంటి విపక్ష నాయకులతో పాటు సాధారణ ప్రయాణికులు కూడా ఈ ఇంధనం వల్ల మైలేజ్ తగ్గుతోందని, రిపేర్ ఖర్చులు పెరుగుతున్నాయని ఆరోపించారు. స్వచ్ఛమైన పెట్రోల్ కంటే ఇథనాల్ ఉత్పత్తి చౌకైనప్పుడు, బంకుల్లో పెట్రోల్ ధరలు ఎందుకు తగ్గడం లేదని వారు ప్రశ్నిస్తున్నారు.
అయితే, ఆటోమోటివ్ రీసెర్చ్ అసోసియేషన్ ఆఫ్ ఇండియా (ARAI) మరియు కార్ల తయారీదారులు విస్తృతంగా పరీక్షించిన తర్వాతే దీనిని తెచ్చామని, E20 ఇంధనం దానికి అనుకూలంగా ఉండే వాహనాలకు సురక్షితమైనదేనని ప్రభుత్వం వాదిస్తోంది. బయోఫ్యూయల్స్ అనేవి చమురు వంటి శిలాజ ఇంధనాల నుండి కాకుండా.. మొక్కజొన్న, చెరకు, సోయాబీన్స్ మరియు పామాయిల్ వంటి పంటల (బయోమాస్) నుండి తయారు చేయబడతాయి. రవాణా రంగంలో పర్యావరణానికి మేలు చేసే ప్రత్యామ్నాయంగా వీటిని ఇంధనాలలో కలుపుతారు.
భారత ప్రభుత్వం తన అసలు గడువు కంటే ఐదేళ్ల ముందే, అంటే 2025 చివరి నాటికి పెట్రోల్లో 20% ఇథనాల్ బ్లెండింగ్ (E20) లక్ష్యాన్ని సాధించింది. 2014లో ఇది కేవలం 1.5% తో ప్రారంభమైంది. ఈ ఏడాది ఏప్రిల్ 1 నుండి దేశంలోని అన్ని పెట్రోల్ బంకుల్లో E20 పెట్రోల్ను అందుబాటులోకి తెచ్చారు.
E20 అంటే ఆ పెట్రోల్లో 80% సాధారణ పెట్రోల్ మరియు 20% ఇథనాల్ ఉంటాయని అర్థం. పెట్రోల్ కంటే ఇథనాల్లో శక్తి సాంద్రత (Energy Density) కొద్దిగా తక్కువగా ఉంటుంది. దీనివల్ల వాహనం ఇచ్చే మైలేజ్ స్వల్పంగా తగ్గే అవకాశం ఉంటుంది. ఇథనాల్ శాతం పెరిగే కొద్దీ (ఉదాహరణకు E5 కంటే E15, E20, E85 లలో) మైలేజ్పై ప్రభావం కాస్త ఎక్కువగా ఉంటుంది. అయితే ఈ మైలేజ్ తగ్గుదల చాలా స్వల్పమని, E20 ఇంధనం వల్ల వాహనాలకు ఎలాంటి నష్టం జరగదని ప్రభుత్వం స్పష్టం చేస్తోంది.ప్రస్తుతం భారతదేశంలోని ఏ రిటైల్ బంకుల్లోనూ ఇథనాల్ లేని 100% స్వచ్ఛమైన పెట్రోల్ కొనుగోలు చేసే అవకాశం లేదు.
Also Read:Chiru158:లేటెస్ట్ క్రేజీఅప్డేట్
ప్రభుత్వ నిబంధనల ప్రకారం, ఏప్రిల్ 1, 2023 నుండి భారతదేశంలో తయారైన అన్ని కార్లు తప్పనిసరిగా E20 నిబంధనలకు అనుగుణంగా ఉండాలి. అయితే విదేశాల నుండి వచ్చి ఇక్కడ అసెంబుల్ అయిన కొన్ని కార్లు ఇందుకు సిద్ధంగా లేకపోవచ్చు.చాలా మంది తయారీదారులు ఇంధన ట్యాంక్ క్యాప్ (Fuel Cap) దగ్గర ఒక స్టిక్కర్పై ‘E20 కాంపాటిబుల్’ అని ముద్రిస్తారు. లేదా వాహన ఓనర్స్ మాన్యువల్లోని ఇంధన స్పెసిఫికేషన్ల విభాగంలో దీనిని పేర్కొంటారు. ఈ రెండు లేనట్లయితే, మీ వాహన రిజిస్ట్రేషన్ నంబర్ లేదా ఛాసిస్ నంబర్ ఉపయోగించి అధీకృత సర్వీస్ సెంటర్ల ద్వారా తెలుసుకోవచ్చు. ప్రస్తుతం హీరో మోటోకార్ప్, మారుతి సుజుకి (వ్యాగన్ఆర్ ఫ్లెక్స్-ఫ్యూయల్) వంటి కొన్ని కంపెనీలు ఫ్లెక్స్-ఫ్యూయల్ వాహనాలను (FFVs) కలిగి ఉన్నాయి. టొయోటా, హ్యుందాయ్, ఎంజీ వంటి సంస్థలు త్వరలో మరిన్ని మోడళ్లను తీసుకురానున్నాయి.