విజయ్ దేవరకొండ, రష్మిక నటించిన ‘గీత గోవిదం’ ఈ నెల 15న ప్రపంచవ్యాప్తంగా గీత గోవిందం చిత్రం విడుదల కానున్న సంగతి తెలిసిందే. ఈ నేపథ్యంలో విడుదల కాకముందే ఈ సినిమా మార్కెట్‌లోకి వచ్చేసింది. ఈ చిత్రానికి సంబంధించిన కొన్ని సీన్లు సోషల్ మీడియాలో హల్‌చల్‌ చేస్తున్నాయి. గుంటూరు సమీపంలోని రెండు ప్రైవేటు ఇంజనీరింగ్ కళాశాలల్లో చదువుతున్న విద్యార్థులు ఈ మూవీ సీన్లను షేర్ చేసుకున్నట్లు గుర్తించారు. ఈ సినిమా పైరసీ వ్యవహారానికి సంబంధించి పలువురు ఇంజనీరింగ్ విద్యార్థులను పోలీసులు అదుపులోకి తీసుకున్నారు.
స్పెషల్ టాస్క్ ఫోర్స్ అధికారులు చేపట్టిన విచారణలో వీరిని అదుపులోకి తీసుకుని ప్రశ్నించగా.. హైదరాబాద్‌లో సినిమా ఎడిటింగ్ సమయంలో ఓ వ్యక్తి వీటిని అక్రమంగా కాపీ చేసినట్లు తేలిందని పోలీస్ అధికారి ఒకరు తెలిపారు. ఈ సీన్లను సదరు వ్యక్తి తన మిత్రులకు పంపాడనీ, వారి నుంచి అవి ఇంజనీరింగ్ కాలేజ్ విద్యార్థులకు చేరాయని వెల్లడించారు. వీరందరిపై పెదకాకాని పోలీస్ స్టేషన్ లో కేసు నమోదు చేశామన్నారు. ఈ కేసుపై గుంటూరు అర్బన్ ఎస్పీ విజయరావు ప్రత్యేక దర్యాప్తునకు ఆదేశించారు.
