విజయదశమి సందర్భంగా నేడు దేశ వ్యాప్తంగా దసరా పండుగను ఎంతో ఆనందంగా జరుపుకుంటున్నారు. ఈ సందర్భంగా తెలుగు సినిమా ప్రేక్షకులకు టాలీవుడ్ ప్రముఖులు దసరా శుభాకాంక్షలు చెబుతున్నారు. ఇదే క్రమంలో మాస్ మహారాజా రవితేజ కూడా శుభాకాంక్షలు చెప్పాడు. కానీ ..చెప్పింది దసరా శుభాకాంక్షలు కాదు..దీపావళి శుభాకాంక్షలు.
అవును.. అందరిలా కాకుండా రవితేజ మాత్రం దసరా శుభాకాంక్షలను కొత్తగా చెప్పాడు. ఈ దీపావళికి ‘రాజా ది గ్రేట్’ సినిమాతో ప్రేక్షకుల ముందుకు రానున్న రవితేజ.. ఆ సినిమాలో సీనియర్ నటుడు రాజేంద్రప్రసాద్, హీరోయిన్ మెహ్రీన్, కమెడియన్ శ్రీనివాసరెడ్డిలతో తెలుగు ప్రేక్షకులకు దసరా శుభాకాంక్షలు తెలిపారు.
ఈ మేరకు చిత్ర యూనిట్ ఓ వీడియోను యూట్యూబ్‌లో పెట్టింది. దీన్ని దర్శకుడు అనిల్ రావిపూడి ట్వీట్ చేశారు. ఇంత వరకు బాగానే ఉన్నా.. వీడియోలోనే చిన్న మత్లబ్ ఉంది. ఆ వీడియోలో రాజేంద్రప్రసాద్ అందరికీ దసరా శుభాకాంక్షలు అని చెబుతుండగా.. వెంటనే రవితేజ ‘దీపావళి శుభాకాంక్షలు’ అని చెబుతున్నాడు. మొత్తానికి దసరా సందర్భంగా ‘రాజా ది గ్రేట్’ను ఇలా ప్రొమోట్ చేస్తున్నారన్నమాట.
