బాలీవుడ్ కండల వీరుడు సల్మాన్ ఖాన్ తాజాగా నటిస్తున్న చిత్రం దబాంగ్ 3. ప్రభుదేవా దర్శకత్వంలో వస్తున్న ఈ చిత్రంలో సల్లు బాయ్‌ సరసన సోనాక్షిసిన్హా హీరోయిన్‌గా నటిస్తోంది. ఈ మూవీలో సల్మాన్ చుల్‌బుల్ పాండేగా ప్రేక్షకులను అల‌రించ‌నున్నాడు.
సల్మాన్ ఖాన్,అర్బాజ్ ఖాన్, నిఖిల్ ద్వివేది ఈ సినిమాకి నిర్మాతలుగా వ్యవహరిస్తున్నారు. భారీ బడ్జెట్‌తో నిర్మితమవుతోన్న ఈ సినిమాకి విడుదల తేదీని ఖరారు చేశారు. డిసెంబర్ 20వ తేదీన ఈ సినిమాను ప్రపంచవ్యాప్తంగా విడుదల చేయనున్నారు.
ఈ చిత్రాన్ని తెలుగు, త‌మిళం, హిందీ, క‌న్న‌డ భాష‌ల‌లో విడుదల చేయనున్నారు. ఇందులో కిచ్చా సుదీప్ ప్ర‌తినాయ‌కుడి పాత్ర పోషిస్తున్న‌ట్టు సమాచారం. దబాంగ్ సిరీస్‌లో వ‌చ్చిన రెండు చిత్రాలు మంచి విజ‌యం సాధించ‌డంతో దబాంగ్ 3పై కూడా బోలెడ‌న్ని ఎక్స్‌పెక్టేష‌న్స్ ఉన్నాయి. మరి ఈ చుల్‌బుల్ పాండే ప్రేక్షకులను ఏ మేరకు అలరిస్తాడో చూడాలి.
