మున్సిపల్ ఎన్నికల ప్రచారానికి సంబంధించి ముఖ్యమంత్రి రేవంత్ రెడ్డి షెడ్యూల్లో మార్పులు చోటుచేసుకున్నాయి. ఎన్నికల సమరం ఉధృతంగా సాగుతున్న నేపథ్యంలో, పార్టీ ప్రచారాన్ని మరింత బలోపేతం చేసే దిశగా సీఎం కొత్త షెడ్యూల్ను ఖరారు చేశారు. ఫిబ్రవరి 4 నుంచి రాష్ట్రవ్యాప్తంగా ప్రచార సభలు ప్రారంభించనున్నారు.
ఈ ప్రచార కార్యక్రమాల ద్వారా ప్రభుత్వ సంక్షేమ పథకాలు, అభివృద్ధి కార్యక్రమాలను ప్రజలకు వివరించడంతో పాటు, మున్సిపల్ ఎన్నికల్లో కాంగ్రెస్ పార్టీకి మద్దతు కోరనున్నారు. స్థానిక సంస్థల ఎన్నికలు రాష్ట్ర అభివృద్ధికి కీలకమని, పట్టణాల ప్రగతికి ప్రజల భాగస్వామ్యం అవసరమని సీఎం రేవంత్ రెడ్డి తన ప్రసంగాల్లో స్పష్టం చేయనున్నట్లు పార్టీ వర్గాలు తెలిపాయి.
షెడ్యూల్ ప్రకారం ఫిబ్రవరి 4న మిర్యాలగూడలో సీఎం తొలి ప్రచార సభ నిర్వహించనున్నారు. అనంతరం ఫిబ్రవరి 5న చొప్పదండిలో ప్రజలను ఉద్దేశించి మాట్లాడనున్నారు. ఫిబ్రవరి 6న నిజామాబాద్లో భారీ బహిరంగ సభకు హాజరుకానున్నారు. అలాగే ఫిబ్రవరి 7న పరిగిలో, ఫిబ్రవరి 8న భూపాలపల్లిలో ప్రచార సభలు నిర్వహించనున్నారు.
ఈ ఐదు రోజుల పాటు జరిగే ప్రచార కార్యక్రమాల్లో మంత్రులు, స్థానిక నేతలు, పార్టీ శ్రేణులు పెద్ద ఎత్తున పాల్గొననున్నారు. సీఎం పర్యటనలను దృష్టిలో ఉంచుకుని పోలీసు, పరిపాలనా అధికారులు విస్తృత ఏర్పాట్లు చేస్తున్నారు.
Also Read:మహా డిప్యూటీ సీఎంగా సునేత్ర పవార్!