వరంగల్లో జరిగే ప్రగతి నివేదన మహాసభలో పాల్గొనేందుకు.. ఇవాళ సీఎం కేసీఆర్ వరంగల్ వెళ్లనున్నారు. ఈ రోజు మధ్యాహ్నం హైదరాబాద్‌లోని ప్రగతిభవన్ నుంచి బయలుదేరి 3:30 గంటలకు బేగంపేట విమానాశ్రయానికి చేరుకొంటారు. అక్కడి నుంచి ప్రత్యేక హెలికాప్టర్‌లో బయలుదేరి సాయంత్రం 4:30 గంటలకు వరంగల్‌లోని సుబేదారి ఆర్ట్స్‌అండ్‌సైన్స్ కాలేజీ మైదానంలో దిగుతారు. అక్కడి నుంచి నేరుగా రాజ్యసభ సభ్యుడు కెప్టెన్ లక్ష్మీకాంతారావు ఇంటికి చేరుకొంటారు. సాయంత్రం 6 గంటలకు ప్రగతినివేదన సభాస్థలానికి చేరుకొంటారు. 6 నుంచి 8 గంటలవరకు సభా కార్యక్రమం జరుగనున్నది. ఈ రోజు రాత్రి ఎంపీ కెప్టెన్ లక్ష్మీకాంతారావు ఇంటిలోనే బసచేయనున్నారు.
శుక్రవారం ఉదయం పూర్వ వరంగల్ జిల్లాలో పలు అభివృద్ధి కార్యక్రమంలో పాల్గొంటారు. స్థానిక నాయకులతో సమావేశమవుతారు. అనంతరం జనగామ జిల్లా పాలకుర్తి నియోజకవర్గంలో పాలకుర్తిలోని సోమేశ్వరాలయాన్ని సందర్శించి పూజలుచేస్తారు, బమ్మెరలో పోతన సమాధిని దర్శించుకుని, ఆదర్శ గ్రామమైన రాఘవపురంలో డబుల్ బెడ్‌రూం ఇండ్ల నిర్మాణం, మిషన్‌భగీరథ, గ్రామసభ నిర్వహించనున్నారు. తిరిగి రేపు సాయంత్రం హైదరాబాద్‌కు చేరుకుంటారు.
