రాజ్యసభ సభ్యులు జోగినపల్లి సంతోష్ కుమార్ జన్మదినోత్సవాన్ని పురస్కరించుకొని గ్రీన్ ఇండియా ఛాలెంజ్ ప్రచురించిన ‘వృక్షవేదం’ పుస్తకాన్ని ముఖ్యమంత్రి కెసిఆర్ సోమవారం ప్రగతిభవన్ లో ఆవిష్కరించారు. దేశపతి శ్రీనివాస్ సంపాదకత్వంలో మామిడి హరికృష్ణ రచించిన ఈ పుస్తకంలో భారతీయ సాహిత్యంలోని వృక్షాలు, వనాల ప్రశస్తితో కూడిన శ్లోకాలను, తెలంగాణ అటవీ సౌందర్యంతో కూడిన ఫోటోలను జతచేసి ప్రచురించారు.
ఈ సందర్భంగా ‘వృక్షవేదం’ పుస్తకాన్ని రూపొందించిన సంతోష్ కుమార్ ను ముఖ్యమంత్రి అభినందించారు. వృక్షాలను దైవంగా భావించే సంస్కృతి మనదని అన్నారు. తెలంగాణ ప్రభుత్వ నిరంతర కృషితో హరిత తెలంగాణ కల సాకారమవుతోన్నదని అన్నారు. ఈ కార్యక్రమంలో వ్యవసాయ శాఖ మంత్రి సింగిరెడ్డి నిరంజన్ రెడ్డి, ఎంఎల్ సి గోరటి వెంకన్న, ఓఎస్డీ దేశపతి శ్రీనివాస్, సాంస్కృతిక శాఖ సంచాలకులు మామిడి హరికృష్ణ,తదితరులు పాల్గొన్నారు.
