సిరివెన్నెల మరణం సినీ లోకానికి తీరని లోటు- సీఎం కేసీఆర్‌

ప్రముఖ సినీ గేయ రచయిత సిరివెన్నెల సీతారామశాస్త్రి ఇకలేరు. ఊపిరితిత్తుల క్యాన్సర్‌తో బాధపడుతూ మంగళవారం సాయంత్రం 4 గంటల సమయంలో తుదిశ్వాస విడిచారు. సిరివెన్నెల మృతి పట్ల తెలంగాణ సీఎం కేసీఆర్ తీవ్ర దిగ్భ్రాంతిని వ్యక్తం చేశారు. ఎటువంటి సంగీత ప్రక్రియలతోనైనా పెనవేసుకుపోయే అద్భుత సాహిత్యాన్ని సిరివెన్నెల సృష్టించారని కొనియాడారు. పండిత, పామరుల హృదయాలను ఆయన గెలుచుకున్నారని చెప్పారు.

సినిమా పేరునే (సిరివెన్నెల) తన ఇంటి పేరుగా మార్చుకున్న ఆయన సాహిత్య ప్రస్థానం.. సామాజిక, సాంప్రదాయ అంశాలను స్పృశిస్తూ మూడున్నర దశాబ్దాల పాటు సాగిందని అన్నారు. ఆయన మరణం తెలుగు చలనచిత్ర రంగానికి, సంగీత సాహిత్య అభిమానులకు తీరని లోటు అన్నారు. సిరివెన్నెల కుటుంబానికి ప్రగాఢ సానుభూతిని తెలియజేశారు.