సినిమాల ప్రభావమో.. సీరియల్స్ ప్రభావమో తెలియదు కానీ.. రోజు రోజుకు పిల్లలో క్రూరత్వం పెరుగుతోంది. సినిమాలలో జరిగే సన్నివేశాలను తలపిస్తున్నారు నేటి విద్యార్థులు. తనకు టీచర్ ఇచ్చిన హోం వర్క్ బాధను తప్పించుకోవడాని ఓ స్కూల్ విద్యార్థి దారుణానికి ఓడిగట్టాడు. ఎవర్నైనా ఒకర్ని చంపితే ఈ రోజు స్కూల్కి సెలవు ఇస్తారని భావించి, 9వ తరగతి విద్యార్థిని హత్య చేశాడు, 10వ తరగతి విద్యార్థి. తీవ్ర కలకలం రేపిన ఈ సంఘటన గుజరాత్ రాష్ట్రం వడోదరలో జరిగింది.
వివరాల్లోకి వెళితే.. వడోదరలోని ఓ స్కూల్లో పదోతరగతి చదువుతున్న పిల్లలకు టీచర్ హోం వర్క్ ఇచ్చింది. ఇక హోం వర్క్ చెయ్యని ఓ విద్యార్థి.. ఈ హోం వర్క్ బాధను ఎలాగైనా తప్పించుకోవాలని అనుకున్నాడు. ఎవర్నైనా ఒకర్ని చంపితే.. స్కూల్కి సెలవు వస్తుందని భావించాడు. ఇదే క్రమంలో 9వ తరగతి చదువుతున్న ఓ విద్యార్థిని, స్కూల్ బాత్ రూమ్లో దారుణంగా హత్య చేశాడు. కత్తితో ఆ విద్యార్థిని 10 సార్లు పొడిచి చంపాడు.
హత్య చేసిన విద్యార్థిని అదుపులోకి తీసుకున్న పోలీసులు, ఆ విద్యార్థి మైనర్ కావడంతో.. బాల నేరస్తుల శిక్షణాలయానికి తరలించారు. విద్యార్థి మానసికి స్థితిపై వైద్యులు పరీక్షలు నిర్వహిస్తున్నారని గుజరాత్ బాలల హక్కుల కమిషన్ చైర్ పర్సన్ జాగృతీ పాండ్యా వెల్లడించారు. ఇలాంటి సంఘటనే గత సంవత్సరం గుర్గావ్లో జరిగింది. పరీక్షలు వాయిదా వేయించాలని భావించిన ఓ విద్యార్థి, ఏడేళ్ల బాలుడిని గొంతు కోసి హత్య చేశాడు.
