మెగాస్టార్ చిరంజీవి 150వ సినిమా ‘ఖైదీ నెం.150’ శర వేగంగా షూటింగ్ జరుపుకుంటోంది. దర్శకుడు వివి వినాయక్ ఈ సినిమా కోసం తన కెరీర్లో ఎప్పుడూ లేనంతగా శ్రమిస్తున్నారు. తన కెరీర్లో ల్యాండ్ మార్క్ మూవీ కావడంతో చిరంజీవి ఈ సినిమాను ఎంతో ప్రతిష్టాత్మకంగా తీసుకున్నారు. చిరంజీవి-లక్ష్మీరాయ్ కాంబినేషన్లో లారెన్స్ కొరియోగ్రఫీలో స్పెషల్ సాంగ్ చిత్రీకరిస్తున్నారు. వాస్తవానికి ఈ సినిమాలో స్పెషల్ సాంగ్ కోసం తొలుత కేథరిన్ ను తీసుకున్నారు. అయితే చివరి నిమిషంలో ఆమెను తప్పించి లక్ష్మీరాయ్ ని ఎంపిక చేశారు.
ఈ విషయాన్ని ట్వీట్ చేస్తూ… ఫ్యాన్స్ తో తన ఆనందాన్నిపంచుకుంది ఈ అమ్మడు. చిరంజీవిగారితో డ్యాన్స్‌ చేస్తుండడం చెప్పలేనంత అనుభూతినిస్తోందంటూ ట్వీట్ చేసింది. వజ్రంలాంటి మనిషని… బంగారం లాంటి హృదయమున్నవాడని పొగడ్తలతో ముంచెత్తింది. వి.వి.వినాయక్ డైరెక్ట్ చేస్తున్న ఈ మూవీలో చిరు సరసన కాజల్‌ నటిస్తోంది.
ప్ర‌స్తుతం హైద‌రాబాద్ అన్న‌పూర్ణ స్టూడియోస్‌లో మెగాస్టార్ చిరంజీవి – ల‌క్ష్మీరాయ్‌లపై రాఘ‌వ లారెన్స్ కొరియోగ్రఫీలో భారీ సెట్‌లో ఓ స్పెషల్ సాంగ్ తెర‌కెక్కిస్తున్నారు. స్పెషల్ సాంగ్స్‌కి స్పెషలిస్ట్ అయిన దేవీశ్రీ ప్రసాద్ ఈ పాటను అదిరిపోయేలా కంపోజ్ చేయడమే కాకుండా లిరిక్స్ కూడా రాశాడు. మూవీ హైలైట్ సాంగ్స్‌లో ఇదొక‌టిగా నిలుస్తుంద‌ని యూనిట్ చెబుతోంది. మెగాస్టార్ – లారెన్స్ కాంబినేష‌న్ అన‌గానే మ‌న‌కు హిట్ల‌ర్‌ మూవీలో అబీబీ అబీబీ… ఇంద్ర మూవీలోని దాయి దాయి దామ అనే వీణ స్టెప్, అలాగే ఠాగూర్ సినిమాలోని `కొడితే కొట్టాలిరా సిక్సు కొట్టాలి… మ‌న్మ‌ధ మ‌న్మ‌ధ.. అనే సాంగ్స్‌ గుర్తుకొస్తాయి. ఈ పాటలకు చిరు వేసిన స్టెప్స్‌కి థియేటర్స్ షేక్ అయ్యాయి.
