మెగాస్టార్ చిరంజీవి హీరోగా కొణిదెల ప్రొడక్షన్స్ బ్యానర్‌పై రామ్ చరణ్ నిర్మించిన చిత్రం సైరా. పరుచూరి బ్రదర్స్ అందించిన కథకు మెగా ఈమేజ్ తగ్గకుండా చరిత్రను కళ్లకు కట్టినట్లు చూపించడంలో సక్సెస్ అయ్యాడు దర్శకుడు సురేందర్ రెడ్డి.
ఇవాళ ప్రపంచవ్యాప్తంగా సినిమా ప్రేక్షకుల ముందుకురాగా ఫస్ట్ షో నుంచే పాజిటివ్ టాక్‌తో దూసుకుపోతోంది. ఈ నేపథ్యంలో సైరా సక్సెస్‌ని రామ్ చరణ్‌తో కలిసి ఎంజాయ్ చేశాడు చిరు. చెర్రీని ఆప్యాయంగా హద్దుకుని ముద్దుపెట్టిన చిరు ఫోటో నెట్టింట్లో వైరల్‌గా మారింది.
హిందీలో సినిమా చూసిన విమర్శకులు సైతం సైరా సూపర్ అంటూ కొనియాడుతున్నారు. చిరు నటన సినిమాకే హైలైట్‌గా నిలిచిందని బొమ్మ పక్కా బ్లాక్ బస్టర్ హిట్‌ అని కొనియాడుతున్నారు. రోమాలు నిక్కబొడిచే డైలాగులు, అద్భుత బ్యాక్ గ్రౌండ్ స్కోర్, విజువల్స్, యుద్ధ సన్నివేశాలు ఇలా సినిమా బాగుందని కితాబిచ్చారు. రామ్ చరణ్ తన తండ్రికి ఈ సినిమాతో జీవితాంతం గుర్తుండిపోయే గిఫ్ట్ ఇచ్చారంటూ మెగా అభిమానులు ఆనందం వ్యక్తం చేస్తున్నారు.
