డ్రగ్స్ వ్యవహారం టాలీవుడ్‌లో ఎంతటి కలకలం రేపిందో తెలిసిందే. సిట్ నుంచి నోటీసులు అందుకున్న సినీస్టార్ల లో చార్మీ కూడా ఉంది. దాంతో నిన్నటి వరకూ డ్రగ్స్ కేసులో చార్మి పేరు మారుమోగింది. సిట్ విచారణ సంగతి ఎలాగున్నా సినిమాల ద్వారా రాని పబ్లిసిటీ చార్మికి డ్రగ్స్ కేసుతో వచ్చేసిందనే చెప్పాలి. ఏ ఛానల్ చూసినా చార్మినే దర్శనం ఇచ్చేది.
ఇప్పుడు ఈ పాపులారిటీని క్యాష్ చేసుకునే పనిలో పడింది చార్మి. అయితే హీరోయిన్‌గా తనను తట్టుకోవడం కష్టమే అని ఫిక్స్ అయ్యిందో ఏమో కాని ఇప్పుడు యాక్టింగ్‌కు ఫుల్‌స్టాప్ పెట్టి యాక్షన్ అనేందుకు రెడీ అయ్యింది. త్వరలో మెగా ఫోన్ పట్టేందుకు సిద్ధమైంది చార్మి.
హీరోయిన్‌గా తన హవా తగ్గిన తరువాత ఛార్మి.. పూరీ కాంపౌండ్‌లో సెటిల్ అయిపోయింది. మధ్యలో కొంత కాలం పూరీ దగ్గర నుండి బయటకు వెళ్లిపోయింది. ఇప్పుడు మళ్ళీ ఆ కాంపౌండ్‌లోనే కనిపిస్తోంది. పూరీ కనెక్ట్స్ పేరుతో పూరిజగన్నాథ్ ఏర్పాటు చేసిన నిర్మాణ సంస్థకు సంబంధించిన బాధ్యతలన్నీ చార్మీనే నిర్వహిస్తోంది. అంతేకాదు తాజాగా పూరి డైరెక్ట్ చేస్తోన్న ‘పైసా వసూల్’ సినిమాలో కూడా తన వంతు బాధ్యతలు నిర్వహిస్తూ.. దాదాపు కో డైరెక్టర్ రేంజ్‌లో పని చేస్తోంది.
సినిమా మొదలైనప్పటి నుండి గుమ్మడికాయ కొట్టే వరకు కూడా పూరితోనే ఉంది. ఇప్పుడు సినిమా టెక్నీషియన్ల లిస్ట్‌లో ఛార్మి పేరు కూడా కనిపించబోతుందని సమాచారం.
అయితే తాజా సమాచారం ప్రకారం ఛార్మితో ఓ సినిమా చేయడానికి పూరి ప్లాన్ చేస్తున్నట్లుగా తెలుస్తోంది. చార్మి దర్శకత్వంలో ఈ సినిమా ఉండబోతుందని టాక్. పూరి ఈ సినిమాకు పరోక్షంగా నిర్మాణ బాధ్యతలు నిర్వహిస్తాడని అంటున్నారు. ఈ సినిమాకు పూరి కథ అందించే అవకాశాలు మెండుగా కనిపిస్తున్నాయి. ఇక ఈ ప్రాజెక్ట్‌కు సంబంధించిన మరిన్ని విషయాలు తెలియాల్సివుంది.
