భారత అంతరిక్ష పరిశోధనా సంస్థ (ఇస్రో) అత్యంత ప్రతిష్టాత్మకంగా చేపట్టిన చంద్రయాన్–2 రాకెట్ ఈ నెల 22వ తేదీన సోమవారం మధ్యాహ్నం 2.43 గంటలకు ప్రయోగించనున్నట్లు ఇస్రో అధికారికంగా ప్రకటించిన విషయం తెలిసిందే. శ్రీ పొట్టి శ్రీరాములు నెల్లూరు జిల్లాలోని సతీశ్‌ ధవన్‌ అంతరిక్ష కేంద్రమైన షార్‌ నుంచి నింగిలోకి జీఎస్‌ఎల్‌వీ-మార్క్‌3ఎం1 వాహక నౌకను ప్రయోగించడానికి శాస్త్రవేత్తలు సర్వం సిద్ధం చేశారు. రాకెట్ సన్నద్ధత సమావేశంలో ఈ మేరకు నిర్ణయం తీసుకున్నారు.
షార్‌లోని కల్పన అతిథి గృహంలో శనివారం ఈ సమావేశం వీడియో కాన్ఫరెన్సు విధానంలో జరిగింది. దీనిలో పాల్గొన్న శాస్త్రవేత్తలు ఈ వాహక నౌక ప్రయోగంపైనే ప్రధానంగా చర్చించారు. ఇంతకు ముందు క్రయోజెనిక్‌ దశలో వచ్చిన సాంకేతిక లోపంతో ఈనెల 15న ప్రయోగానికి 56 నిమిషాల ముందు దీనిని వాయిదా వేసిన విషయం తెలిసిందే. ఆ లోపాన్ని ఎలా అధిగమించారు, మున్ముందు ఇలాంటివి తలెత్తకుండా తీసుకున్న చర్యలేమిటి, అయిదు రోజుల వ్యవధిలో చేసిన పనులపై సమావేశంలో సమీక్షించారు.
అనంతరం పొద్దు పోయేవరకు లాంచ్‌ ఆథరైజేషన్‌ బోర్డు (ల్యాబ్‌) సమావేశం జరిగింది. ల్యాబ్‌ ఛైర్మన్‌గా ఉన్న రాజరాజన్‌.. వాహక నౌక ప్రయోగానికి ఈ సమావేశంలో అనుమతి ఇచ్చారు. కౌంట్‌డౌన్‌ ఆదివారం సాయంత్రం 6.43 గంటలకు ప్రారంభం కానుంది. ఈ మేరకు అన్ని ఏర్పాట్లు చేశారు. ఇది 20 గంటలపాటు నిరంతరాయంగా కొనసాగిన తరువాత జీఎస్‌ఎల్‌వీ-మార్క్‌3ఎం1 వాహకనౌక 3.8 టన్నుల బరువు గల చంద్రయాన్-2 ఉపగ్రహాన్ని రోదసిలోకి మోసుకెళ్లనుంది.
ఇక ఈ ప్రయోగాన్ని వీక్షించేందుకు సందర్శకుల కోసం భారీ గ్యాలరీని అధికారులు సిద్ధం చేశారు. ప్రయోగ వేదికకు సమీపంలోని శబరి గిరిజన కాలనీ ప్రాంతంలో సుమారు 60 ఎకరాల అటవీ భూమిలో ఈ గ్యాలరీని నిర్మించారు. దీంట్లో సుమారు 5 వేల మంది సందర్శకులు కూర్చుని రాకెట్ ప్రయోగాన్ని వీక్షించవచ్చు. ఈ నెల 15న చంద్రయాన్-2 ప్రయోగం వాయిదా పడడంతో రాకెట్ లాంచింగ్‌ను చూడాలనుకున్న వీక్షకులకు నిరాశే మిగిలింది. అయితే, గతంలో ఆన్‌లైన్‌లో నమోదు చేసుకున్న వాళ్లకు ఇచ్చిన సీరియల్ నంబర్లతో పాసులు తీసుకొని ఈ నెల 22న ప్రయోగాన్ని సందర్శకులు వీక్షించవచ్చని ఇస్రో పేర్కొంది.
