అల్లూరి జిల్లాలో జరిగిన ఘోర రోడ్డుప్రమాదం చిత్తూరు జిల్లాలో విషాదాన్ని మళ్లీ రాజేసింది. ప్రమాదానికి గురైన బస్సు చిత్తూరు నగరం మిట్టూరు శ్రీ విఘ్నేశ్వర ట్రావెల్స్కు చెందినదిగా గుర్తించారు. ఈ నెల 6న మొత్తం 39 మంది యాత్రికులతో చిత్తూరు నుంచి బయలుదేరిన ఈ బస్సు, ఏడు రోజులపాటు పుణ్యక్షేత్రాల దర్శనానికి ఏర్పాటు చేసిన ట్రిప్లో భాగంగా ప్రయాణిస్తుండగా దుర్ఘటన చోటుచేసుకుంది.
ఈ తీర్థయాత్ర ప్రైవేట్ ఏజెంట్ రామ్మూర్తి ఆధ్వర్యంలో సాగింది. చిత్తూరు నగరంతో పాటు పరిసర గ్రామాల ప్రజలు పెద్ద సంఖ్యలో ఈ యాత్రలో పాల్గొన్నారు. భక్తి యాత్రగా ప్రారంభమైన ప్రయాణం, లోయలో పడిన ఈ ప్రమాదంతో ఒక్కసారిగా విషాదంలోకి మారిపోయింది. ఘటన వివరాలు తెలిసిన వెంటనే రాష్ట్ర వ్యాప్తంగా ఆందోళన వ్యక్తమవుతోంది.
ప్రమాదంపై ముఖ్యమంత్రి ఎన్. చంద్రబాబు నాయుడు తీవ్ర విచారం వ్యక్తం చేశారు. బాధితుల వివరాలు తెలుసుకుని, మృతుల కుటుంబాలకు తన ప్రగాఢ సానుభూతిని ప్రకటించారు. వెంటనే ఉన్నతాధికారులు ఘటనాస్థలికి చేరుకొని సహాయక చర్యలు వేగవంతం చేయాలని, అన్ని శాఖలు సమన్వయంతో పనిచేసి గాయపడిన వారికి ఉత్తమ చికిత్స అందించాలని సీఎం ఆదేశించారు.
అల్లూరి జిల్లాలో జరిగిన ఈ విషాదంపై ప్రధాని నరేంద్ర మోదీ కూడా దిగ్భ్రాంతి వ్యక్తం చేశారు. మృతుల కుటుంబాలకు ప్రగాఢ సానుభూతి తెలుపుతూ, గాయపడినవారు త్వరగా కోలుకోవాలని ఆకాంక్షించారు. అదే విధంగా డిప్యూటీ సీఎం పవన్ కళ్యాణ్, మంత్రి నారా లోకేశ్ కూడా బాధితులకు అండగా ఉంటామని ప్రకటిస్తూ సంతాపం తెలిపారు.
పుణ్యక్షేత్రాల యాత్రలో పాల్గొన్న సాధారణ కుటుంబాలపై ఈ ప్రమాదం భారీ విషాదాన్ని మోపింది. రాష్ట్ర ప్రభుత్వం బాధితుల పక్కన నిలిచి తగిన సహాయం అందించేందుకు చర్యలు చేపట్టింది.
Also Read:మంత్రి కొండాపై నాన్ బెయిలబుల్ వారెంట్