టీపీఎల్‌కు బీసీసీఐ గ్రీన్ సిగ్న‌ల్‌!

 తెలంగాణ ప్రీమియ‌ర్ లీగ్ (టీపీఎల్) నిర్వ‌హ‌ణ‌కు బీసీసీఐ గ్రీన్ సిగ్న‌ల్ ఇచ్చింద‌ని హైద‌రాబాద్ క్రికెట్ అసోసియేష‌న్ (హెచ్‌సీఏ) అధ్య‌క్షుడు అర్శ‌న‌ప‌ల్లి జ‌గ‌న్ మోహ‌న్ రావు తెలిపారు. శ‌నివారం ముంబైలోని బీసీసీఐ ప్రధాన కార్యాలయంలో జరిగిన సంయుక్త కార్య‌ద‌ర్శి ఎన్నికలో గోవా క్రికెట్ అసోసియేషన్‌కి చెందిన రోహన్ దేశాయ్ ఎన్నికయ్యారు.

ఈ ఎన్నికలో హెచ్‌సీఏ ప్రతినిధిగా జగన్ మోహన్ రావు పాల్గొని రోహ‌న్ అభ్య‌ర్థిత్వాన్ని బ‌ల‌ప‌ర్చారు. ఈ ఎన్నికల‌ అనంతరం బీసీసీఐ అధ్యక్షుడు రోజర్ బిన్నీ, కార్య‌ద‌ర్శి దేవాజిత్ సైకియా, ట్రెజరర్ ప్రభ్‌తేజ్ సింగ్ భాటియా, సంయుక్త కార్య‌ద‌ర్శి రోహ‌న్‌తో జ‌గ‌న్ మోహన్ రావు, హెచ్‌సీఏ ఉపాధ్య‌క్షుడు ద‌ల్జీత్ సింగ్‌, కౌన్సిల‌ర్ సునిల్ అగ‌ర్వాల్‌ ప్రత్యేకంగా భేటీ అయ్యారు.

Also Read:వేరుశెనగలతో అద్భుత ప్రయోజనాలు

టీపీఎల్‌తో పాటు తెలంగాణ‌లో ప్రఖ్యాతి గాంచిన మొయినుద్దౌలా గోల్డ్ కప్‌ను తిరిగి ప్రారంభించేందుకు బీసీసీఐ స‌హ‌క‌రించాల‌ని జ‌గ‌న్ మోహ‌న్ రావు కోర‌గా, బీసీసీఐ ఆ విజ్ఞ‌ప్తిని స్వాగతించింది. ఐపీఎల్ ముగిసిన త‌ర్వాత‌ జూన్‌లో టీపీఎల్ నిర్వ‌హ‌ణ‌కు బీసీసీఐ అనుమ‌తి ఇచ్చింద‌ని జ‌గ‌న్ మోహ‌న్ రావు తెలిపారు. అలానే రాష్ట్రంలో క్రికెట్ మౌలిక స‌దుపాయాల అభివృద్ధికి కూడా బీసీసీఐ స‌హ‌క‌రించాల‌ని జ‌గ‌న్ మోహ‌న్ రావు చేసిన విన్న‌పాన్ని బోర్డు కార్య‌వ‌ర్గ స‌భ్యుల నుంచి సంపూర్ణ మ‌ద్ద‌తు ల‌భించింది.