యావత్‌ సినీ ప్రపంచం ఎంతో ఆసక్తిగా ఎదురుచూస్తున్న చిత్రం ‘బాహుబలి: ది కన్‌క్లూజన్‌’. ముఖ్యంగా, బాహుబలి ని కట్టప్ప ఎందుకు చంపాడనే ప్రశ్న నేపథ్యంలో ఈ చిత్రాన్ని చూసేందుకు అభిమానులు, ప్రేక్షకులు ఎంతో ఆసక్తిగా ఉన్నారు.
అయితే ఇన్నాళ్ల ఎదురు చూపులకు.. ఏప్రిల్ 28 తెర దించనుంది. ఇన్నాళ్లూ ఫ్యాన్సంతా ఈ సినిమా కోసం వెయిట్‌ చేస్తున్న క్రమంలోనే ఈ సినిమాకు సంబంధించిన మరో విషయం ఇప్పుడు హాట్ టాపిక్ అయింది. బాహుబలి-2 సినిమాకు సంబంధించి కొన్ని ఫొటోలు ఆన్‌లైన్‌లో హల్ చల్ చేస్తున్నాయి. ఆ ఫొటోలు చూసిన వారు.. అప్పుడే బాహుబలి-2 ప్రీమియర్లు స్టార్టైపోయాయా? అంటూ షాక్ అవుతున్నారు.
వాస్తవానికి గురువారం సాయంత్రం ఓవర్సీస్‌లో ప్రీమియర్లతో బాహుబలి-2 ప్రభంజనానికి తెర లేవాల్సి ఉంది. భారత్‌లో శుక్రవారం ఉదయం నుంచి ప్రీమియర్లు మొదలు కాబోతున్నాయి. కానీ, సినిమాలోని కొన్ని ఫొటోలు ఇప్పుడు నెట్‌లో ప్రత్యక్షమవడంతో అప్పుడే సినిమా ప్రీమియర్ పడిపోయిందా అని బాహుబలి ఫ్యాన్స్‌ చర్చించుకుంటున్నారు.
అయితే.. పలువురు మాత్రం సెన్సార్ సభ్యులకు షో వేసినప్పుడు తీసిన ఫొటో అయి ఉండొచ్చన్న అనుమానాన్నీ వ్యక్తం చేస్తున్నారు. అయితే ఈ ఫొటోలు నిజంగా బాహుబలి-2 ప్రీమియర్లకు సంబంధించిందా? లేక లీక్‌ అయ్యాయా? అనే అనుమానం కూడా వ్యక్తమౌతోంది.
అయితే ఇప్పటికే ‘అత్తారింటికి దారేది’ సినిమా రిలీజ్‌కి ముందే పూర్తిగా పైరసీకి గురైన విషయం తెలిసిందే. ఇదిలా ఉంటే..తాజాగా ‘బాహుబలి-2’ సినిమా విడుదలకు ముందే లీకయ్యిందన్న గాసిప్స్‌ కూడా గుప్పుమంటున్నాయి. మరి ఇందులో ఏది నిజమో..ఏది అబద్ధమో తెలియాల్సిఉంది.
