అమరావతిని అంతర్జాతీయ స్థాయిలో బ్రాండ్గా తీర్చిదిద్దే లక్ష్యంతో రాష్ట్ర ప్రభుత్వం కీలక నిర్ణయం తీసుకుంది. ఈ ప్రయత్నాల్లో భాగంగా ‘ఆవకాయ్’ అనే ప్రత్యేక పేరుతో సినిమా సంస్కృతి, సాహిత్యోత్సవాన్ని నిర్వహించనున్నట్లు రాష్ట్ర పర్యాటక, సాంస్కృతిక, సినిమాటోగ్రఫీ శాఖ మంత్రి కందుల దుర్గేష్ వెల్లడించారు. ఆంధ్రప్రదేశ్ సంప్రదాయం, కళలు, సినిమాటిక్ వారసత్వాన్ని ప్రపంచానికి చాటడమే ఈ ఉత్సవం ప్రధాన ఉద్దేశమని మంత్రి తెలిపారు.
ఈ ప్రతిష్ఠాత్మక కార్యక్రమం నిర్వహణ కోసం ప్రభుత్వం రూ.5 కోట్ల నిధులను కేటాయించింది. ఉత్సవ నిర్వహణ బాధ్యతలను ‘టీమ్ వర్క్ ఆర్ట్స్’ అనే ప్రైవేటు సంస్థకు అప్పగించినట్లు మంత్రి స్పష్టం చేశారు. కార్యక్రమాన్ని సక్రమంగా, ఆకర్షణీయంగా నిర్వహించేందుకు అనుభవజ్ఞులైన సంస్థను ఎంపిక చేశామని ఆయన వివరించారు.
‘ఆవకాయ్’ ఫెస్టివల్లో సినిమా ప్రదర్శనలు, సాహిత్య సమావేశాలు, సాంస్కృతిక కార్యక్రమాలు, ప్రముఖుల భాగస్వామ్యంతో చర్చా వేదికలు ఏర్పాటు చేయనున్నట్లు తెలుస్తోంది. ఇది కేవలం వినోదాత్మక కార్యక్రమమే కాకుండా, అమరావతి నగరానికి ప్రత్యేక గుర్తింపు తీసుకువచ్చే వేదికగా నిలుస్తుందని ప్రభుత్వం ఆశాభావం వ్యక్తం చేస్తోంది.
Also Read:‘బాహుబలి’ ప్రయోగం సక్సెస్:ఇస్రో
అంతేకాకుండా, ప్రతి ఏడాది సంక్రాంతికి ముందు ఆవకాయ్ ఉత్సవాన్ని నిర్వహించాలని ప్రభుత్వం నిర్ణయించినట్లు మంత్రి కందుల దుర్గేష్ తెలిపారు. ఈ ఉత్సవం ద్వారా పర్యాటకం పెరగడమే కాకుండా, స్థానిక కళాకారులకు, సాహితీవేత్తలకు, సినీ రంగానికి ప్రోత్సాహం లభిస్తుందని ఆయన పేర్కొన్నారు. అమరావతి అభివృద్ధిలో ఇది మరో కీలక అడుగుగా నిలవనుందని విశ్లేషకులు అభిప్రాయపడుతున్నారు.