ఆంధ్రప్రదేశ్ అసెంబ్లీ సమావేశాలు ఘనంగా ప్రారంభమయ్యాయి. ఈ సందర్భంగా 2026-27 ఆర్థిక సంవత్సరానికి సంబంధించిన వార్షిక బడ్జెట్ను సభ ముందుకు తీసుకువచ్చారు. ఆర్థిక శాఖ మంత్రి పయ్యావుల కేశవ్ రూ.3,32,205.33 కోట్లతో రూపొందించిన బడ్జెట్ను సభలో ప్రవేశపెట్టారు. రాష్ట్ర అభివృద్ధి, సంక్షేమం మరియు మౌలిక వసతుల విస్తరణకు ప్రాధాన్యం ఇస్తూ ఈ బడ్జెట్ను సమతుల్యంగా రూపొందించినట్లు మంత్రి తెలిపారు.
బడ్జెట్ ప్రసంగంలో జాతీయ భద్రత అంశాన్నీ ప్రస్తావించారు. జమ్మూకశ్మీర్లో అమాయక పర్యాటకులపై దాడి చేసిన ఉగ్రవాద మూకలకు “ఆపరేషన్ సిందూర్” ద్వారా భారత ప్రభుత్వం గట్టి సమాధానం ఇచ్చిందని పేర్కొన్నారు. ప్రధానమంత్రి నాయకత్వంలో భారత్ శక్తివంతమైన దేశంగా ఎదిగి, ప్రపంచ వేదికపై గౌరవాన్ని పొందిందని చెప్పారు. భారతీయులు సగర్వంగా తలెత్తుకునేలా దేశం ముందుకు సాగుతోందని మంత్రి వ్యాఖ్యానించారు.
ఇక బడ్జెట్ కేటాయింపుల విషయానికి వస్తే, విద్యా రంగానికి పెద్దపీట వేశారు. స్కూల్ ఎడ్యుకేషన్కు రూ.32,308 కోట్లు కేటాయించారు. బీసీ వెల్ఫేర్కు రూ.23,650 కోట్లు, పంచాయతీరాజ్ మరియు గ్రామీణాభివృద్ధి శాఖకు రూ.22,941 కోట్లు కేటాయించారు. ఆరోగ్య రంగానికి రూ.19,306 కోట్లు కేటాయిస్తూ వైద్య సేవల మెరుగుదలకు చర్యలు తీసుకుంటున్నట్లు తెలిపారు. జలవనరుల అభివృద్ధికి రూ.18,223 కోట్లు, విద్యుత్ శాఖకు రూ.13,934 కోట్లు కేటాయించారు.
వ్యవసాయ రంగానికి రూ.11,745 కోట్లు కేటాయిస్తూ రైతుల సంక్షేమం మరియు సాగునీటి సదుపాయాల విస్తరణపై దృష్టి సారించారు. సాంఘిక సంక్షేమ శాఖకు రూ.11,118 కోట్లు, వెనకబడిన వర్గాల అభివృద్ధికి రూ.10,699 కోట్లు కేటాయించారు.
Also Read:మంత్రి పదవి ఇవ్వకపోతే సీఎం అవుతా!
ఈ బడ్జెట్ ద్వారా రాష్ట్ర సమగ్రాభివృద్ధి, సామాజిక న్యాయం మరియు ఆర్థిక పురోగతిని సాధించడమే లక్ష్యమని ప్రభుత్వం వెల్లడించింది.