‘మహానటి’ సినిమాలో అనుష్క శెట్టి కూడా కనిపించనుంది. అవును…నాగ్ అశ్వీన్ దర్శకత్వంలో అలనాటి అందాల నటి సావిత్రి జీవితాధారంగా తెరకెక్కుతున్నవిషయం తెలిసిందే. ఈ సినిమాలో సావిత్రి పాత్రలో కీర్తి సురేష్ నటిస్తోంది.
జర్నలిస్టు పాత్రలో సమంత కూడా ముఖ్య భూమిక పోషిస్తోన్న ఈ సినిమాలో… విజయ్ దేవరకొండ, దుల్కర్ సల్మాన్, షాలినీ పాండే, మోహన్ బాబు, ప్రకాష్ రాజ్ కూడా పలు పాత్రలో కనిపించనున్నారు.
తాజాగా ఈ సినిమాలో సావిత్రికి సన్నిహితురాలు, సహ నటి భానుమతి పాత్ర కోసం టాలీవుడ్‌ లేడీ హీరోగా అభిమానులు పిలుచుకునే అనుష్క శెట్టిని సంప్రదించినట్లు తెలిసింది. అయితే ఈ పాత్రకు అనుష్క శెట్టి ఒప్పుకుందా లేదా అనేది తెలియాల్సి ఉంది.
సినిమా ప్రారంభానికి ముందే చిత్ర యూనిట్ అనుష్కని సంప్రదించారు. అయితే, ఆ పాత్రకు సంబంధించిన సన్నివేశాలు ఇంకా చిత్రీకరించలేదు. త్వరలోనే అనుష్క కూడా షూటింగ్‌లో పాల్గొనే అవకాశాలున్నాయని టాక్‌.
వైజయంతి మూవీస్‌ పతాకంపై రూపొందిస్తున్న ఈ సినిమా మార్చి 29న తెలుగు, తమిళం, మలయాళ భాషల్లో విడుదల చేసేందుకు సన్నహాలు చేస్తున్నారు. అశ్వినీదత్ నిర్మాణ సారధ్యంలో రూపొందుతున్న ఈ సినిమాకు మిక్కీ జే మేయర్ సంగీతం అందిస్తున్నారు.
