హీరో అల్లు అర్జున్ ప్రస్తుతం సుకుమార్ దర్శకత్వంలో ‘పుష్ప’ చిత్రంలో నటిస్తున్నాడు. ఇందులో అల్లు అర్జున్ పుష్పరాజ్ అనే లారీ డ్రైవర్ పాత్రను పోషిస్తున్నాడు. దాంతో సినిమాలో అతను చిత్తూరు యాసలో మాట్లాడుతుంటాడట. ఈ చిత్రం కథ శేషాచలం అడవుల్లో జరిగే ఎర్రచందనం స్మగ్లింగ్ నేపథ్యంలో సాగుతుంది.
ప్రస్తుతం ఈ మూవీ షూటింగును హైదరాబాదులో నిర్వహించడానికి సన్నాహాలు చేస్తున్నారు. నగర శివారులోని ఓ వ్యవసాయ క్షేత్రాన్ని కథకి అనుగుణంగా మార్చుకుని, షూటింగు చేయడానికి ఏర్పాట్లు చేస్తున్నట్టు సమాచారం. వచ్చే వారం నుంచి ఇక్కడ కీలక సన్నివేశాలను చిత్రీకరిస్తారట. బన్నీ సరసన రష్మిక కథానాయికగా నటిస్తున్న ఈ చిత్రానికి దేవిశ్రీ ప్రసాద్ సంగీతాన్ని సమకూరుస్తున్నాడు.
ఇక ఈ సినిమా షూటింగ్ ఆమధ్య తూర్పు గోదావరి జిల్లా మారేడుమిల్లి అడవుల్లో కొన్నాళ్ల పాటు జరిగింది. ఆ షెడ్యూలులో హీరో, విలన్ల గ్యాంగుపై ఓ యాక్షన్ ఎపిసోడ్, ఓ పాటను చిత్రీకరించారు. అయితే, మధ్యలో యూనిట్ లో కొందరికి కరోనా సోకడంతో షూటింగును అర్థాంతరంగా ఆపేసి, హైదరాబాదుకి తిరిగొచ్చేశారు. ఇప్పుడు కొవిడ్ నుంచి అందరూ కోలుకున్నట్టు తెలుస్తోంది.
