తెలంగాణలో రేపు మున్సిపల్ ఎన్నికలు జరగనున్నాయి. ఎన్నికలకు సంబంధించి అవసరమైన అన్ని ఏర్పాట్లను ఎన్నికల కమిషన్ పూర్తిచేసింది. రాష్ట్రవ్యాప్తంగా మొత్తం 123 పట్టణ స్థానిక సంస్థలకు పోలింగ్ నిర్వహించనున్నారు. ఇందులో మున్సిపాలిటీలు, నగర పంచాయతీలు ఉండగా, ప్రజాస్వామ్య పండుగకు పట్టణ ప్రాంతాలు సిద్ధమయ్యాయి.
ఈ ఎన్నికల్లో మొత్తం 2,996 వార్డులు ఉండగా, వాటిలో పోటీ చేయడానికి 12,930 మంది అభ్యర్థులు బరిలో దిగారు. అధికార పార్టీతో పాటు ప్రతిపక్ష పార్టీలు, స్వతంత్ర అభ్యర్థులు కూడా విస్తృతంగా పోటీలో ఉన్నారు. పట్టణాభివృద్ధి, మౌలిక వసతులు, తాగునీరు, పారిశుద్ధ్యం, రోడ్లు, ఉద్యోగావకాశాలు వంటి అంశాలు ఎన్నికల ప్రచారంలో ప్రధానంగా నిలిచాయి.
పోలింగ్ ప్రక్రియ ప్రశాంతంగా సాగేలా భద్రతా ఏర్పాట్లు కట్టుదిట్టం చేశారు. పోలింగ్ కేంద్రాల వద్ద పోలీసు బలగాలను మోహరించారు. ఎలాంటి అవాంఛనీయ ఘటనలు జరగకుండా ప్రత్యేక చర్యలు తీసుకున్నట్లు అధికారులు తెలిపారు. ఓటర్లు స్వేచ్ఛగా తమ ఓటు హక్కును వినియోగించుకునేలా అన్ని సౌకర్యాలు కల్పించారు.
ఈ ఎన్నికల ఫలితాలు ఫిబ్రవరి 13న వెల్లడికానున్నాయి. మున్సిపల్ ఎన్నికల ఫలితాలు రాష్ట్ర రాజకీయాలపై ప్రభావం చూపే అవకాశం ఉండటంతో అన్ని పార్టీల్లో ఉత్కంఠ నెలకొంది. పట్టణ ప్రజలు ఎవరికి పట్టం కడతారన్నది ఆసక్తికరంగా మారింది.
Also Read:TTD:లడ్డూ విక్రయ కేంద్రాల వద్దే UPI పేమెంట్స్