మ‌ళయాళ సినీ న‌టి భావన లైంగిక వేధింపుల‌కు గురైంది. కేరళలోని ఎర్నాకుళం జిల్లాలో ఈ ఘ‌ట‌న జ‌రిగింది. భావనను కిడ్నాప్ చేసిన దుండగులు లైంగికంగా వేధించిన‌ట్లు తెలుస్తున్న‌ది. నిన్న కేరళలోని త్రిస్సూర్ నుంచి కోచికి భావన కారులో బయల్దేరింది. కొంతమంది ఓ టెంపులో భావన కారును ఫాలో అయ్యారు. కోచిలోని నెడుంబస్సెరీ అంతర్జాతీయ విమానాశ్రయం వద్దకు రాగానే భావన కారును టెంపుతో ఢీకొట్టారు. ఆ తర్వాత టెంపులో ఉన్నవారు కారు డ్రైవర్ మార్టిన్‌ను బయటకు లాగి కారులో కూర్చున్నారు.
దుండగులు భావనను బందీగా చేసుకుని కారును నగరంలో గంటన్నర పాటు తిప్పారు. ఆ సమయంలో దుండగులు భావన పట్ల అనుచితంగా ప్రవర్తించి ఆమెతో ఫొటోలు, వీడియోలు దిగారు. ఆ తర్వాత పలరివట్లోమ్ జంక్షన్ వద్ద కారును, ఆమెను వదిలి పారిపోయారు.
అనంతరం భావన పోలీసులకు ఫిర్యాదు చేయగా ప్రాథమిక విచారణలో ఆమె వద్ద గతంలో కారు డ్రైవర్‌గా పనిచేసిన సునీల్ కుమార్ ఆమెను కిడ్నాప్ పథకం వేసినట్టు తేలింది. అతనిపై క్రిమినల్ కేసులు ఉన్నాయని తెలిపారు. తనపై అసత్య ప్రచారాలు చేస్తున్నాడనే కారణంతో భావన అతన్ని ఉద్యోగం నుంచి తొలగించింది. దీంతో సునీల్ భావనను కిడ్నాప్ చేయడానికి ప్రయత్నించినట్టు పోలీసులు చెప్పారు. భావన తెలుగులో ఒంటరి, హీరో, మహాత్మా, నిప్పు సినిమాల్లో నటించింది. తెలుగుతో పాటు తమిళం, కన్నడ, మలయాళ భాషల్లో మొత్తం 70 సినిమాల్లో నటించింది.
ఇటీవలె తాను పెళ్లి చేసుకుంటానని ప్రకటించిన భావన కొన్నేళ్లుగా కన్నడ ప్రొడ్యూసర్ నవీన్ ను ప్రేమిస్తున్న సంగతి తెలిసిందే.
