ఇటీవల గుండెపోటుతో క‌న్న‌డ పవర్‌ స్టార్‌ పునీత్ రాజ్ కుమార్ కన్నుమూసిన విషయం తెలిసిందే. ఆయన మృతితో అభిమానులు, కుటుంబ స‌భ్యులు, స‌న్నిహితులు తీవ్ర విషాదంలో మునిగిపోయారు.ఈ క్రమంలో పునీత్‌కు తమిళ హీరో సూర్య నివాళులు అర్పించారు. శుక్రవారం బెంగళూరు వెళ్లిన ఆయన కంఠీరవ స్టూడియోస్ లోని పునీత్ సమాధిని సందర్శించారు.
ఈ సందర్భంగా సూర్య భావోద్వేగాలను అదుపు చేసుకోలేక కంటతడి పెట్టారు. అంత్యక్రియలకు రాలేకపోయానంటూ తీవ్ర విచారం వ్యక్తం చేశారు. పునీత్ సోదరుడు శివరాజ్ కుమార్ కూడా సూర్య వెంట ఉన్నారు. ఆయన కూడా తమ్ముడి మరణం తాలూకు బాధ నుంచి ఇంకా తేరుకోలేదనడానికి నిదర్శనంగా చెమర్చిన కళ్లతో కనిపించారు.
చిన్న వయసులోనే ఎంతో పేరుసంపాదించుకున్న పునీత్ హఠాత్మరణం చెందడంతో టాలీవుడ్, కోలీవుడ్‌, బాలీవుడ్ ప్ర‌ముఖులు షాక్‌లో ఉండిపోయారు. పునీత్ మ‌ర‌ణించిన సమ‌యంలో వేరే ప‌నులతో బిజీగా ఉండి రాలేని వారు ఇప్పుడు ఆయన కుటుంబ స‌భ్యుల‌ని ప‌రామ‌ర్శిస్తున్నారు.
