సినీనటుడు,శ్రీవిద్యానికేతన్ సంస్థల అధినేత మంచు మోహన్ బాబు వైసీపీలో చేరారు. ఇవాళ ఉదయం పార్టీ అధ్యక్షుడు జగన్ సమక్షంలో లోటస్‌పాండ్‌లో వైసీపీ తీర్థం పుచ్చుకున్నారు. వైసీపీ గెలుపు కోసం రాష్ట్రవ్యాప్తంగా మోహన్ బాబు ప్రచారం చేయనున్నట్టు తెలుస్తోంది.
కొన్ని రోజులుగా తన విద్యాసంస్థలకు రావాల్సిన ఫీజు రియంబర్స్‌మెంట్‌ విషయమై ఏపీ ప్రభుత్వంపై మోహన్ బాబు తీవ్ర విమర్శలు గుప్పిస్తున్న విషయం తెలిసిందే. ఈ నేపథ్యంలో వైసీపీ కండువా కప్పుకున్నారు.
అంతేగాదు వైఎస్ కుటుంబంతో మంచు ఫ్యామిలీకి మంచి సన్నిహిత సంబంధాలున్నాయి. మంచు విష్ణు భార్య వెరోనికాకు జగన్ అన్న అవుతారు. తాజాగా మోహన్ బాబు వైసీపీలో చేరడం రాజకీయంగా ప్రాధాన్యత సంతరించుకుంది.
తన కెరీర్‌లో 500కి పైగా సినిమాలు చేసిన మోహన్ బాబు లక్ష్మీప్రసన్న బ్యానర్‌పై సినిమాలను కూడా నిర్మించారు. అనంతరం టీడీపీలో చేరిన ఆయన ఆ పార్టీ నుండి రాజ్యసభ సభ్యుడిగా ఎన్నికయ్యారు.
