నల్గొండ, వరంగల్‌, రంగారెడ్డి జిల్లాల స్థానిక సంస్థల ఎమ్మెల్సీ ఎన్నికల ఫలితాలు నేడు రానున్నాయి.. ఈ మూడు జిల్లాల్లోనూ ఉదయం ఎనిమిది గంటలకు ఓట్ల లెక్కింపు ప్రారంభమవుతుంది. రంగారెడ్డి ఎమ్మెల్సీ స్థానం ఓట్ల లెక్కింపు రాజేంద్రనగర్‌ వెటర్నరీ కాలేజీలో, నల్గొండ ఎమ్మెల్సీ స్థానం ఓట్ల లెక్కింపు దుప్పలపల్లి ఎస్‌డబ్ల్యూ గోడౌన్‌లో, వరంగల్‌ ఎమ్మెల్సీ స్థానం ఓట్ల లెక్కింపు ఎనుమాముల మార్కెట్‌యార్డులో జరుగుతుంది.
నల్గొండలో మొత్తం 1086 మంది ఎమ్మెల్సీ ఓటర్లు ఉండగా …1073 మంది ఓటు హక్కును వినియోగించుకున్నారు. ఇక్కడ టీఆర్ఎస్ పార్టీ నుంచి తేరా చిన్నపరెడ్డి, కాంగ్రెస్ పార్టీ అభ్యర్థిగా మునుగోడు ఎమ్మెల్యే కోమటిరెడ్డి రాజగోపాల్ రెడ్డి సతీమణి లక్ష్మీ పోటీలో వున్నారు.
రంగారెడ్డి ఎమ్మెల్సీ స్థానానికి టీఆర్ఎస్ నుంచి మాజీ మంత్రి మహేందర్‌రెడ్డి, కాంగ్రెస్ నుంచి కొమ్మూరి ప్రతాప్‌రెడ్డి పోటీపడుతున్నారు. వరంగల్‌ జిల్లాలో టీఆర్ఎస్ నుంచి పోచంపల్లి శ్రీనివాస్‌రెడ్డి, కాంగ్రెస్ అభ్యర్థిగా ఇనుగాల వెంకట్రామిరెడ్డి బరిలోకి దిగారు. ఓట్లు క్రాస్ అయ్యాయని ప్రచారం జరుగుతున్న నేపథ్యంలో కౌంటింగ్ పై ఉత్కంఠ నెలకొంది.
