సినీ నటుడు ప్రకాష్ రాజ్ బెంగళూరు సెంట్రల్ నియోజకవర్గం నుండి స్వతంత్ర్య అభ్యర్థిగా ఎంపీ రేసులో ఉన్న సంగతి తెలిసిందే. కన్నడ,తమిళ,తెలుగు వాళ్లు అధికంగా ఉండే ఈ ప్రాంతంలో తనదైన శైలీలో ప్రచారం చేస్తూ దూసుకుపోతున్నారు. ప్రకాష్ రాజ్ ఎన్నికల ప్రచారానికి ప్రజల నుండి మంచి స్పందన వస్తుండగా తాజాగా హీరో విశాల్…ప్రకాష్ రాజ్‌కు మద్దతు ప్రకటించారు.
స్వతంత్య్ర అభ్యర్థిగా ఎన్నికల్లో పోటీ చేసి విజయం సాధించడం చాలకష్టమని అందుకు ధైర్యంతో పాటు ప్రజలకు సేవ చేయాలనే ద్రుఢ సంకల్పం అవసరమన్నారు. అందుకు సరైన వ్యక్తి ప్రకాష్‌రాజ్‌ అన్నారు.
విజిల్‌గుర్తుపై పోటీచేస్తున్న ఆయనకు తాను ‘విజిల్‌’ వేసి అభినందిస్తున్నానని తెలిపారు. ఈ ఎన్నికల్లో విజయం సాధించి ప్రజల కోసం ఆయన గళం విప్పాలని, ఆ అవకాశాన్ని ప్రజలు అందిస్తారని నమ్మకం ఉందన్నారు. సమాజంలో జరిగే మంచి విషయాలను స్వాగతిస్తూ, చెడు విషయాలపై గళం విప్పుతున్న వ్యక్తిగా ప్రకాష్‌రాజ్‌ నిలిచారని కొనియాడారు.
మరోవైపు ప్రచారంలో మోడీ టార్గెట్‌గా విమర్శలు గుప్పిస్తూ ముందుకుసాగుతున్నారు ప్రకాష్ రాజ్. నరేంద్ర మోడీకి వ్యక్తిగతంగా తాను వ్యతిరేకం కాదని, అతని ఆలోచన విధానాలకు మాత్రమే వ్యతిరేకం అని స్పష్టం చేస్తున్నారు. ప్రధానమంత్రిగా మోడీ మళ్ళి గెలవడం తనకు ఇష్టం లేదని తాను మత రాజకీయాలు చేయనని చెబుతూ వస్తున్నారు.
