లోక్‌ సభ ఎన్నికల ప్రచారంలో టీఆర్ఎస్ అధినేత,తెలంగాణ సీఎం కేసీఆర్ విస్తృత ప్రచారం నిర్వహిస్తున్నారు. దాదాపు అన్ని లోక్‌ సభ నియోజకవర్గాలలో భారీ బహిరంగ సభలతో గులాబి దళానికి మరింత జోష్‌ను నింపుతున్నారు కేసీఆర్. 16 ఎంపీ స్థానాలు గెలుపే లక్ష్యంగా ముందుకు దూసుకుపోతున్నారు. ఈ సందర్భంగా ఈ రోజు వికారాబాద్‌లో చేవెళ్ల పార్లమెంట్ నియోజకవర్గ టీఆర్ఎస్ ఎన్నికల ప్రచార సభ జరగనుంది. ఇక్కడి నుండి టీఆర్ఎస్ ఎంపీ అభ్యర్థిగా రంజిత్‌ రెడ్డి పోటీలో ఉన్నారు.
25 ఎకరాల స్థలంలో ఈ బహిరంగ సభను నిర్వహించనున్నారు. ఈ సభకు సీఎం కేసీఆర్ హాజరుకానున్నారు. టీఆర్ఎస్ సభ సందర్భంగా గులాబీ శ్రేణులు భారీ ఏర్పాట్లు చేశారు. బహిరంగ సభకు 2లక్షల జనం తరలిరానున్నారు. బహిరంగ సభ నేపథ్యంలో వికారాబాద్ పరిసరాల్లో ట్రాఫిక్ ఆంక్షలు విధించనున్నారు. సభకు వచ్చే వాహనాల పార్కింగ్ కోసం ప్రత్యేక ఏర్పాట్లు చేశారు.
