సోషల్ మీడియాలో ఫోటోలు,పోస్ట్‌లతో తరచూ వార్తల్లో నిలుస్తుంది జనసేన అధినేత పవన్ కల్యాణ్ మాజీ భార్య రేణు దేశాయ్. రేణు సినీ నటిగానే కాక సామాజిక వేత్తగా పలు కార్యక్రమాల్లో పాల్గొంటుంది. తాజాగా ఆమె ఏపీలోని కర్నూలు జిల్లాలో పర్యటించారు. రేణు దేశాయ్ కర్నూలు జిల్లాలో ఉండటం ఏమిటనేగా మీ సందేహం..
అయితే అసలు విషయంలోకి వెళ్దాం.. ఒక ప్రముఖ తెలుగు టీవీ న్యూస్ ఛానల్‌కు సంబంధించిన ఒక కార్యక్రమాన్ని ఆమె నిర్వహిస్తున్నారు. గత ఏడాది ఆత్మహత్యకు పాల్పడిన రెండు రైతు కుటుంబాలను ఆమె పరామర్శించడానికి రేణు దేశాయ్ కర్నూలులో పర్యటించారు. అయితే, ఈ సందర్భంగా రేణు టీవీ యాంకర్ పాత్రను పోషించడం విశేషం.
ఇదిలావుంటే.. ఓ వైపు పవన్ కల్యాణ్ కర్నూలు జిల్లాలో పర్యటిస్తున్న సమయంలోనే.. అదే జిల్లాలో రేణు దేశాయ్ కూడా సందడి చేస్తుండటం, అది కూడా పవన్‌కు వ్యతిరేక పార్టీకి చెందిన టీవీ లోగో పట్టుకుని రైతులను ఇంటర్వ్యూ లు చేస్తుండటం షాకింగ్‌గా మారింది. దీంతో వైసీపీ, జనసేన శ్రేణుల్లో చర్చకు దారితీస్తోంది.
పవన్‌కు పోటీగా రేణు దేశాయ్‌ని వైసీపీ రంగంలోకి దించిందని కొందరు వ్యాఖ్యానిస్తున్నారు. దీని వెనుక ప్రశాంత్ కిశోర్ వ్యూహం ఉందని అనుకుంటున్నారు. మరోపక్క, టీడీపీ, జనసేనలు చేతులు కలపబోతున్నాయని మీడియాలో కథనాలు వస్తున్న సంగతి తెలిసిందే.
