నందమూరి అభిమానులు ఎంతగానో ఎదురుచూసిన సమయం రానే వచ్చింది. టాలీవుడ్ నటుడు బాలకృష్ణ ప్రధాన పాత్రలో నందమూరి తారకరామారావు బయోపిక్ ‘ఎన్టీఆర్’ రెండు పార్టులుగా తెరకెక్కుతున్న విషయం తెలిసిందే. కథానాయకుడు, మహానాయకుడు చిత్రాలుగా ప్రేక్షకుల ముందుకురానుంది. క్రిష్ దర్వకత్వంలో తెరకెక్కుతున్న ఈ మూవీ ట్రైలర్‌ను తాజాగా విడుదల చేశారు. ఈ రోజు ఎన్టీఆర్ బయోపిక్ ఆడియో వేడుక కార్యక్రమం హైదరాబాద్, ఫిల్మ్ నగర్ లోని జేఆర్సీ కన్వెన్షన్ హాల్‌లో జరిగింది.
ఈ వేడుకకు ఆడియో వేడుకకు నందమూరి బాలకృష్ణ, బాలీవుడ్ నటి విద్యా బాలన్, దర్శకుడు క్రిష్, సూపర్ స్టార్ కృష్ణ, రెబల్ స్టార్ కృష్ణంరాజు, డైలాగ్ కింగ్ మోహన్ బాబు, ప్రముఖ దర్శకుడు కె. రాఘవేంద్రరావు, నందమూరి కుటుంబసభ్యులు తదితరులు హాజరయ్యారు. సినీ ప్రముఖులు జ్యోతి ప్రజ్వలన చేశారు. తన తండ్రి ఎన్టీఆర్ పాత్రను ఈ బయోపిక్‌లో పోషిస్తున్న బాలకృష్ణ పట్టువస్త్రాల్లో మెరిసిపోయారు. ఈ చిత్రం ట్రైలర్ ను ఎన్టీఆర్ కుమార్తెలు గారపాటి లోకేశ్వరి, దగ్గుబాటి పురందేశ్వరి, నారా భువనేశ్వరి, కంఠమనేని ఉమా మహేశ్వరి విడుదల చేశారు.
‘ఆ రామారావు ఏంటి? కృష్ణుడేంటి?.. మార్చండి’ అని ఓ వ్యక్తి అంటే.. ‘రామారావు చక్కగా సరిపోతారండీ. ఆయన కళ్లల్లో ఓ కొంటెతనం ఉంటుంది’ అని మరో వ్యక్తి సమాధానం చెప్పే డైలాగ్‌తో ట్రైలర్ ఆరంభమైంది. ఇందులో బలయ్య డైలాగులు ఎంతగానో అకట్టుకున్నాయి. ఎన్టీఆర్ బాల్యం నుంచి రాజకీయ రంగ ప్రవేశం వరకూ ‘కథానాయకుడు’గా రాబోతోంది. అక్కడి నుంచి అంతిమ ఘడియల వరకూ ‘మహానాయకుడు’లో చూపించబోతున్నారు. తొలి భాగాన్ని వచ్చే ఏడాది జనవరి 9న, రెండో భాగాన్ని ఫిబ్రవరి 7న విడుదల చేయనున్నారు.
