తెలంగాణ అసెంబ్లీ ఎన్నికల పోలింగ్ ప్రశాంతంగా సాగుతోంది. ఓటు వేసేందుకు పోలింగ్ సెంటర్లకు ఓటర్లు బారులు తీరారు. పలువురు సినీ,రాజకీయ ప్రముఖులు ఓటు హక్కు వినియోగించుకున్నారు. మెగాస్టార్ చిరంజీవి కుటుంబ సభ్యులతో కలిసి ఓటు హక్కు వినియోగించుకున్నారు.
తన కుటుంబ సభ్యులందరూ ఓటు హక్కును వినియోగించుకుంటున్నారని చిరంజీవి అన్నారు. రామ్‌చరణ్‌ విదేశాలకు వెళ్లడంతో ఓటు వేసే అవకాశాన్ని కోల్పోయాడని చెప్పారు. సినీ కథా రచయిత పరుచూరి గోపాలకృష్ణ ఫిలింనగర్‌లో ఓటు వేశారు. జూబ్లీ హిల్స్‌లో ఓటు వేశారు నాగార్జున దంపతులు. ఓటు వేయడం ఎంతో ముఖ్యమని, ఐదేళ్లకోసారి వచ్చే ఈ అవకాశాన్ని అందరూ తప్పనిసరిగా వినియోగించుకోవాలన్నారు. ప్రతి ఒక్కరూ తమ ఓటు హక్కును వినియోగించుకోవాలని అల్లు అర్జున్‌ విజ్ఞప్తి చేశారు.
గవర్నర్‌ నరసింహన్‌ దంపతులు ఖైరతాబాద్ రాజానగర్‌ పోలింగ్ బూత్‌లో ఉదయాన్నే ఓటు వేశారు.బీజేపీ నేత కిషన్‌ రెడ్డి అయన కుటుంబ సభ్యులు కాచిగూడలో ఓటు వేశారు. కూకట్‌పల్లి తెలుగుదేశం పార్టీ అభ్యర్థి సుహాసిని నాంపల్లి హుముయూన్‌ నగర్‌లో ఓటు హక్కు వినియోగించుకున్నారు.
