జియో వచ్చాక పెద్ద కంపెనీల నుండి చిన్న చిన్న కంపెనీలు కూడా ఆఫర్లను ప్రకటిస్తున్న విషయం తెలిసిందే. అయితే ఇప్పటివరకు వెయ్యి నుంచి రూ. 1500 వరకు ఉండే ఆఫర్లతో ప్రకటించిన కంపెనీలు ఉండగా..ఇప్పుడు ఏకంగా కేవలం రూ.1కే స్మార్ట్ ఫోన్ అంటూ సంచలనం రేపుతోంది చైనాకు చెందిన షియోమీ కంపెనీ. చైనాకు చెందిన మొబైల్ తయారీదారు షియోమీ దీపావళి పండుగను పురస్కరించుకుని ప్రత్యేక సేల్‌ను నిర్వహించనుంది.
దీపావళి పండుగ సందర్భంగా తన ఎంఐ ఆన్‌లైన్ స్టోర్‌లో ఎంఐ సేల్ పేరిట ఓ ప్రత్యేక సేల్‌ను ఈ నెల 23 నుంచి 25వ తేదీ వరకు నిర్వహిస్తున్నది. ఇందులో పలు షియోమీ స్మార్ట్‌ఫోన్లు, మొబైల్ యాక్ససరీలను కేవలం రూ.1కే ఫ్లాష్ సేల్‌లో విక్రయించనున్నారు. అలాగే ప్రొడక్ట్స్ కొనుగోలుపై వినియోగదారులకు రూ.50, రూ.100, రూ.200, రూ.500 విలువ గల డిస్కౌంట్ కూపన్లను కూడా అందివ్వనున్నారు. ఈ నెల 23వ తేదీన ఉదయం 10 గంటలకు సేల్ ప్రారంభం కానుంది.
సేల్ జరగనున్న తేదీల్లో ప్రతి రోజు ఉదయం 11 నుంచి సాయంత్రం 5 గంటల వరకు రూ.1 సేల్ కొనసాగుతుంది. ఇందులో రెడ్‌మీ నోట్ 4, ఎంఐ రూటర్ 3సీ, రెడ్‌మీ 4, ఎంఐ బ్లూటూత్ మినీ స్పీకర్, ఎంఐ సెల్ఫీ స్టిక్, రెడ్‌మీ 4ఎ, ఎంఐ బ్యాండ్ హెచ్‌ఆర్‌ఎక్స్ ఎడిషన్, ఎంఐ క్యాప్సూల్ ఇయర్‌ఫోన్స్, ఎంఐ వైఫై రిపీటర్, ఎంఐ బ్యాక్‌ప్యాక్, ఎంఐ వీఆర్ ప్లేలను కేవలం రూ.1కే పొందేందుకు అవకాశం ఉంటుంది. అదేవిధంగా సేల్ జరిగే రోజుల్లో మధ్యాహ్నం 2 నుంచి సాయంత్రం 6 గంటల వరకు యాప్‌లో బిడ్ టు విన్ సేల్ ను నిర్వహించనున్నారు.
షియోమీ నిర్వహించనున్న ఎంఐ దీపావళి సేల్‌లో ఎస్‌బీఐ క్రెడిట్ కార్డులను ఉపయోగించి ప్రొడక్ట్స్‌ను కొనుగోలు చేస్తే రూ.750 ఇన్‌స్టంట్ డిస్కౌంట్‌ను ఇస్తారు. అందుకు గాను వినియోగదారులు కనీసం రూ.7500 ఆపైన విలువ గల ప్రొడక్ట్స్‌ను కొనుగోలు చేయాలి. అలాగే రెడ్‌మీ నోట్ 5 ప్రొ, పోకో ఎఫ్1 ఫోన్లను పేటీఎం ద్వారా కొనుగోలు చేస్తే రూ.500 క్యాష్‌బ్యాక్ ఇస్తారు. మొబిక్విక్‌తో అయితే రూ.2వేల వరకు సూపర్ క్యాష్‌ను ఇస్తారు. అమెజాన్ పే ద్వారా ఎంఐ టీవీ కొంటే రూ.500 తగ్గింపు అదనంగా ఇస్తారు. పలు ఎంపిక చేసిన షియోమీ ఫోన్లను కొంటే రూ.3500 విలువైన ఇక్సిగో కూపన్లను ఇస్తారు.
