Jr ఎన్.టి.ఆర్ కి బలం చేకూరాలి – మహేష్
ప్రముఖ నటుడు, రాజకీయ నాయకుడు అయిన నందమూరి హరికృష్ణ రోడ్డు ప్రమాదం లో అకాల మరణం చెందడం సినీ ఇండస్ట్రీని ,రాజకీయ ప్రముఖుల్ని తీవ్ర దిగ్భ్రాంతికి గురిచేస్తోంది. తన కుటుంబానికే కాక ఎంతో మంది సన్నిహితులకు అండగా నిలబడి వాళ్లందరికీ ఆత్మీయుడైన హరికృష్ణ మరణ వార్త విని ఆయన అభిమానులంతా కన్నీటి పర్యంతమవుతున్నారు. సినీ ప్రముఖులు కూడా వార్త విన్న వెంటనే దిగ్బ్రాంతి చెంది, ఆయన మరణం ఇండస్ట్రీకి తీరని లోటు అంటూ సోషల్ మీడియా ద్వారా అశృనివాళులర్పిస్తున్నారు. ప్రిన్స్ మహేష్ కూడా విషయం తెలిసిన వెంటనే స్పందించి తన మాటల్ని అంతర్జాలం ద్వారా పంచుకున్నారు.
“హరికృష్ణ గారి మరణ వార్త తీవ్రమైన ఆందోళనకు గురిచేస్తోంది. ఆయన ఆత్మకు శాంతి చేకూరాలని మనస్ఫూర్తిగా కోరుకుంటున్నాను. ఇలాంటి పరిస్థితిని ఎదుర్కోవడానికి జూనియర్ ఎన్.టి.ఆర్ కు, అతని కుటుంబానికి బలం, స్వాంతన చేకూరాలని కోరుకుంటున్నాను.” అని తన సంతాపాన్ని వ్యక్తం చేసారు మహేష్ బాబు. హరికృష్ణ మరణం ఆయన కుటుంబానికే కాక రెండు తెలుగు రాష్ట్రాల్లోని నందమూరి అభిమానులకి ఓ తీరని లోటు అనే చెప్పాలి.
