తెలుగు చిత్ర పరిశ్రమలో సీనియర్ నటీనటులు, రాజకీయ నాయకుల జీవిత చరిత్రలను బయోపిక్‌గా తెరకెక్కించే పనిలో పడ్డారు టాలీవుడ్ దర్శక, నిర్మాతలు. ఇటీవలే అలనాటి నటి సావిత్రి జీవిత కథ ఆధారంగా రూపొందించిన సినిమా ‘మహానటి’. నాగ్ అశ్విన్ దర్శకత్వంలో వచ్చిన ఈ చిత్రం ఈ మధ్యే విడుదలై ప్రమఖుల నుంచి ప్రశంసలందుకుంటోంది.
ఇక ఆంధ్రప్రదేశ్ మాజీ సీఎం దివంగత వైఎస్.రాజశేఖర్ రెడ్డి జీవిత కథను బయోపిక్‌గా తెరకెక్కిస్తున్నారు దర్శకుడు మహి వీ రాఘవ. ఈ సినిమాకు ‘యాత్ర’ అనే టైటిల్‌తో ఫస్ట్ లుక్‌ను కూడా విడుదల చేశారు చిత్ర యూనిట్. ఇక విషయానికొస్తే లెజండరీ యాక్టర్, మాజీ సీఎం దివంగత నందమూరి తారక రామారావు బయోపిక్‌ను ‘ఎన్టీఆర్’ అనే టైటిల్‌తో తెరకెక్కించేందుకు ప్రయత్నాలు జరిగాయి. గ్రాండ్‌గా ఈ సినిమా లాంచ్‌ కూడా చేశారు దర్శక, నిర్మాతలు. కానీ ఉన్నట్టుండి ఈ మెగా ప్రాజెక్ట్ నుండి తప్పుకున్నారు దర్శకుడు తేజ. అప్పటి నుంచి ఈ సినిమాను కష్టాలు వెంటాడుతున్నాయి.
ఈ సినిమాకు డైరెక్టర్ విషయంలో అనేక పేర్లు చక్కర్లు కొడుతున్నాయి. ఈ చిత్రానికి బాలకృష్ణే దర్శకత్వం వహిస్తారాని, లేదూ లేదూ..రాఘవేంద్రరావు డైరెక్టర్ అని ఇలా అనేక దర్శకుల పేర్లు సోషల్ మీడియాల్లో కోడై కూస్తున్నాయి. ఇలాంటి కష్టాల్లో ఉన్న ఈ సినిమా ఎప్పుడు పట్టాలెక్కుతుందో అని ఎన్టీఆర్ అభిమానులు ఎదురు చూస్తున్నారు. ఇలాంటి సమయంలో బాలకృష్ణ ఏం చేయాలో తెలియని పరిస్థితుల్లో ఉన్నాడట. తాజా సమాచారం ప్రకారం బాలకృష్ణ వి.వి.వినాయక్‌ దర్శకత్వంలో ఓ సినిమాలో నటించబోతున్నట్టు వార్తలు ఊపందుకున్నాయి. ఇప్పటి పరిస్థితులను చూస్తుంటే ‘ఎన్టీఆర్’ బయోపిక్ మరింత ఆలస్యం అయ్యే సూచనలు కనిపిస్తున్నాయి. మరీ ఇంతకు ఎన్టీఆర్ బయోపిక్ లేనట్లేనా..? అని ఎన్టీఆర్ అభిమానులు నిరాశతో ఉన్నారు.
