సినీ ప్రముఖుల్లో, అభిమానుల్లో ఆసక్తి రేపిన మహానటి చిత్రం నేడు ప్రేక్షకుల ముందుకు వచ్చింది. లెజెండరీ నటి సావిత్రి జీవిత చరిత్రని నాగ అశ్విన్ మహానటిగా తెరకెక్కించాడు. నేడు విడుదలైన మహానటి చిత్రానికి ఆడియన్స్ నుంచి అద్భుతమైన రెస్పాన్స్ వస్తోంది. ప్రముఖ దర్శకులు రాఘవేంద్ర రావు, రాజమౌళి తొలిరోజే చూశారంటే మహానటి చిత్రంపై సెలెబ్రెటీల్లో ఉన్న ఆసక్తి అర్థం అవుతుంది.
మహానటి చరిత్రను అద్భుతంగా తెరకెక్కించారంటూ సినీ అభిమానులు ప్రశంసలు కురిపిస్తున్నారు. ఈ సినిమాపై దర్శక దీరుడు రాజమౌళి స్పందించారు. గొప్ప చిత్రాన్ని తీశారంటూ నాగ్ అశ్విన్, స్వప్నలను అభినందించారు. సావిత్రి పాత్రలో కీర్తి సురేష్ ఒదిగిపోయిన తీరు సూపర్బ్ అంటూ కితాబిచ్చారు. తన జీవితంలో తాను చూసిన అత్యద్భుత పర్ఫామెన్స్ లలో ఈ చిత్రంలో కీర్తి సురేష్ ది ఒకటని చెప్పారు. మహానటికి ఆమె మళ్లీ జీవం పోశారని కితాబిచ్చారు. దుల్కర్ సల్మాన్ నటన అద్భుతంగా ఉందని… అతనికి తాను ఇప్పుడు ఫ్యాన్ గా మారిపోయానని ట్వీట్ చేశారు.
ఇక ఈ సినిమా గురించి దర్శకేంద్రుడు రాఘవేంద్రరావు ఆయన స్పందనను తెలిపారు.. 28 సంవత్సరాల క్రితం ఇదే రోజున ‘జగదేకవీరుడు అతిలోక సుందరి’ సినిమా విడుదలైంది. ఆ భారీ వర్షం.. చాలా పెద్ద సినిమా తీశాము అనే ఆనందం .. ఎలా ఆడుతుందోననే భయం. ఎప్పుడు వరద ఆగుతుందా అని ఎదురుచూపు. ఎట్టకేలకు సాయంత్రం నుంచి జనాలు థియేటర్ల వైపు కదిలారు. మరుసటి రోజు నుంచి అభిమానుల రూపంలో థియేటర్లకు వరదరావడం మొదలైంది. మా దత్తు (అశ్వనీదత్) గారికి ఆ రోజున ఎంత ఆనందం వేసిందో మరిచిపోలేను.
ఆ సినిమా విడుదలైన రోజునే ‘మహానటి’ విడుదల కావడం విశేషం. అప్పట్లో ‘జగదేకవీరుడు అతిలోక సుందరి’ నిర్మించడానికి ఎంత ధైర్యం కావాలో .. ఇప్పుడు ‘మహానటి’ నిర్మాణానికి అంతే ధైర్యం కావాలి. ఈ సినిమాను తెరకెక్కించిన దర్శక నిర్మాతలకు .. ప్రధానమైన పాత్రలను పోషించిన కీర్తి సురేశ్ .. దుల్కర్ సల్మాన్ లకు .. చిత్ర యూనిట్ కి అభినందనలు” అంటూ ట్విట్టర్ ద్వారా ఆయన ఆనందాన్ని వ్యక్తం చేశారు.
