భారతీయ సినీ పరిశ్రమలో ప్రస్తుతం బయోపిక్‌ల ట్రెండ్ నడుస్తోంది. బాలీవుడ్‌ దగ్గరి నుంచి టాలీవుడ్ వరకు సినీ,రాజకీయ,క్రీడాకారుల బయోపిక్‌లకు డిమాండ్ పెరిగింది. ధోని,సచిన్ బయోపిక్‌లకు మంచి రెస్పాన్స్ రాగా టాలీవుడ్‌లో ఎన్టీఆర్ ,మాజీ సీఎం రాజశేఖర్ రెడ్డి బయోపిక్‌లు తెరకెక్కుతున్న సంగతి తెలిసిందే. ఎన్టీఆర్ బయోపిక్‌ను ముగ్గురు దర్శకులు తెరకెక్కిస్తున్నారు. బాలకృష్ణ హీరోగా తేజ దర్శకత్వంలో ఓ సినిమా తెరకెక్కుతుండగా వర్మ దర్శకత్వంలో మరొకటి,కేతిరెడ్డి జగదీశ్ రెడ్డి దర్శకత్వంలో మరో సినిమా తెరకెక్కుతోంది.
తాజాగా ఏఎన్నార్ బయోపిక్‌కు రంగం సిద్ధమైంది. మనం సినిమా అక్కినేని కుటుంబానికి ఓ మర్చిపోలేని మధుర జ్ఞాపకం. అక్కినేని కుటుంబంలోని మూడు తరాల నటులు నటించిన సినిమా ఇది. అక్కినేని నాగేశ్వర రావు, నాగార్జున, నాగచైతన్య, అఖిల్ అందరూ సింగిల్ ఫ్రేమ్‌లో కనిపించి అక్కినేని అభిమానులని అద్భుతంగా ఎంటర్‌టైన్‌ చేశారు. ఇదే ఎఏన్నార్ బయోపిక్ అని అనుకున్నారంతా కానీ టాలీవుడ్‌లో ఓ ఆసక్తిరమైన వార్త చక్కర్లు కొడుతోంది.
అక్కినేని బయోపిక్ కి సంబంధించిన పనులు సైలెంట్‌గా జరుగుతున్నాయి. కొన్ని నెలల క్రితమే అక్కినేని జీవితానికి సంబంధించిన రీసెర్చ్ వర్క్ మొదలైందట. రీసెర్చ్ వర్క్ తుదిదశకు చేరుకోవడంతో త్వరలోనే అఫిషియల్ అనౌన్స్‌మెంట్ ఇవ్వనున్నారట నాగ్. అక్కినేని సినిమా ఎంట్రీ మొదలు .. ఆయన పడ్డ కష్టాలు,ఇండస్ట్రీలో టాప్‌ హీరోగా రాణించడం వరకు బయోపిక్‌లో చూపించనున్నారట. ఈ సినిమాలో యంగ్ ఏఎన్నార్ గా చైతూ .. తర్వాత దశలో ఏఎన్నార్ గా నాగ్ కనిపించనున్నారట.
తెలుగు చిత్రపరిశ్రమకి ఎన్టీ రామారావు,అక్కినేని నాగేశ్వరరావు రెండుకళ్లు . ఇద్దరూ కూడా విభిన్నమైన,విలక్షణమైన పాత్రల్లో అశేష ప్రజల అభిమానాన్ని సొంతం చేసుకున్నారు. ఈ నేపథ్యంలో వీరి బయోపిక్‌ల కోసం అంతా ఆసక్తిగా ఎదురుచూస్తున్నారు. అయితే ఇప్పటికే ఎన్టీఆర్ బయోపిక్ ప్రారంభం కాగా ఏఎన్నార్ బయోపిక్ ఉంటుందా లేదా అన్నదానిపై స్పష్టతమాత్రం రావడం లేదు.
