ఏదైన ఓ సినిమా ఎక్కువ‌గా జ‌నాల నోళ్ళ‌ల్లో నానుతుంది అంటే వెంట‌నే ఆ సినిమా పేరుతోనో లేదంటే అందులోని ముఖ్య పాత్ర‌ల పేరుతో రెస్టారెంట్‌లు ఏర్పాటు చేయ‌డం కామ‌న్‌గా మారింది. ఆ మ‌ధ్య బాహుబ‌లి చిత్రంలోని పాత్ర‌ల పేరుతో మెనూనే రెడీ చేసి జ‌నాల దృష్టిని ఆక‌ర్షించే ప్ర‌య‌త్నం చేశారు హోట‌ల్ నిర్వాహ‌కులు. అయితే ఇప్పుడు హైదరాబాద్ లోని కొంపల్లిలో ‘రంగస్థలం’ పేరుతో ఓ రెస్టారెంట్ ఓపెన్ చేశాడు ఓ హోట‌ల్ నిర్వాహ‌కుడు.
ఈ రెస్టారెంట్‌కు సంబందించిన ఫోటో ప్రస్తుతం సోషల్ మీడియాలో వైరల్ అవుతోంది. అయితే ఈ రెస్టారెంట్‌కు ‘రంగస్థలం’ అనే పేరు పెట్టడం వెనుక అసలు ఉద్దేశ్యం ఏమిటో తెలియదు కానీ.. సదరు రెస్టారెంట్‌కి మాత్రం యమ పబ్లిసిటీ వచ్చేసింది. అటుగా వెళ్తున్న జనాలంతా ఈ రెస్టారెంట్ గురించే మాట్లాడుకుంటూ.. ఓ సారి అందులోకి వెళ్లి వస్తున్నారు. మెగా హీరో రామ్ చరణ్ తేజ్, దర్శకుడు సుకుమార్ కాంబినేషన్‌లో రూపుదిద్దుకున్న‘రంగస్థలం’ సినిమా విడుద‌ల‌కు సిద్ధ‌మైన విష‌యం తెలిసిందే.
ప్రపంచ వ్యాప్తంగా 1700 స్క్రీన్ లపై ‘రంగస్థలం’ విడుదల కాబోతోంది. ఇప్పటికే ఈ సినిమాలో పాటలు, డైలాగ్స్, టీజర్లు, ట్రైలర్లు, గ్రామీణ వాతావరణం ప్రేక్షకులను బాగా ఆకట్టుకున్నాయి. ఈ సినిమాపై అంచనాలను భారీగా పెంచేశాయి.
