మెగా ప‌వ‌ర్ స్టార్ రామ్ చరణ్ తేజ్‌- యంగ్ టైగ‌ర్ ఎన్టీఆర్ హీరోలుగా దర్శకధీరుడు రాజమౌళి దర్శకత్వంలో భారీ మల్టీస్టారర్ తెరకెక్కుతున్నట్లు కొంతకాలంగా వార్తలు వెలువడుతున్న సంగతి తెలిసిందే. దీనిపై ఇప్పటివరకు క్లారిటీ రాలేదు. ఈ నేపథ్యంలో మూవీ ఉండనుందా లేదా అనే వార్తలకు జక్కన్న పుల్ స్టాప్ పెట్టారు.
త్వరలోనే ఈ చిత్రం సెట్స్‌పైకి వెళ్లనుందని రాజమౌళి ట్వీట్ చేశారు. నవంబరు 18, 2017 నుంచి ఎంతో ఆసక్తిగా ఎదురుచూస్తున్న సినిమా గురించి ఇది అధికారిక ప్రకటన. భారీ మల్టీస్టారర్ మొదలైంది అంటూ రాజమౌళి ట్విట్టర్‌ ద్వారా అనౌన్స్ చేశారు. #RRR అంటే రాజమౌళి,రామారావు,రామ్‌చరణ్‌ అంటూ ఇంగ్లీష్ పేర్లలో ‘ఆర్‌’ వచ్చేలా వీడియోను షేర్ చేశారు. ఇది సినిమా టైటిల్‌ కాదని దిగ్గజాలు కలిసివస్తున్నారని పేర్కొన్నారు.
డీవీవీ ఎంటర్‌టైన్‌మెంట్‌ పతాకంపై ఈ సినిమా తెరకెక్కనుంది. బాక్సింగ్‌ నేపథ్యంలో సాగే ఈ సినిమాలో ఎన్టీఆర్, రామ్‌చరణ్‌ అన్నదమ్ముల్లా కలిసినటించే అవకాశం ఉన్నట్లు తెలుస్తోంది. ఇప్పుడు టాలీవుడ్‌ దృష్టి మొత్తం ఈ ప్రాజెక్టుపైనే వుంది. ప్రస్తుతం చరణ్.. బోయపాటి శ్రీను దర్శకత్వంలో తెరకెక్కే సినిమాతో బిజిగా ఉండగా, త్రివిక్రమ్‌ సినిమా కోసం ఎన్టీఆర్ సిద్ధమవుతున్నారు.
