సుప్రీం హీరో సాయిధరమ్ తేజ్ మొదటి నుంచి కూడా మాస్ ఆడియన్స్ ను ఆకట్టుకునే కథా కథనాలకే ప్రాధాన్యతనిస్తూ వస్తున్నాడు. తాజాగా వినాయక్ దర్శకత్వంలో చేసిన ‘ఇంటిలిజెంట్’ కూడా మాస్ యాక్షన్ ఎంటర్టైనరే. ఈ నెల 9వ తేదీన ప్రేక్షకుల ముందుకురానున్న ఈ సినిమాపై భారీ అంచనాలు నెలకొన్నాయి. ఈ సినిమా ప్రేక్షకులను పలకరించడానికి ముస్తాబవుతూ ఉండగానే తన నెక్ట్స్ సినిమాలపై మరింత దృష్టిసారించాడు తేజు.
కరుణాకరన్ దర్శకత్వంలో తేజు చేస్తున్న తాజా షెడ్యూల్ ఈ నెల 16 నుంచి మొదలుకానుంది. ఇంతవరకూ సాయిధరమ్ చేస్తూ వచ్చిన పాత్రలకి ఈ సినిమాలోని పాత్ర పూర్తి భిన్నంగా ఉంటుందని అంటున్నారు. ఈ సినిమాలో సాయిధరమ్ తేజ్ జోడీగా అనుపమ పరమేశ్వరన్ అలరించనుంది. క్రియేటివ్ కమర్షియల్స్ బ్యానర్ పై రూపొందుతోన్న ఈ సినిమాకి గోపీసుందర్ సంగీతాన్ని అందిస్తున్నాడు.
దీంతో పాటు చంద్రశేఖర్ యేలేటి దర్శకత్వంలో సినిమాకు కమిట్ అయ్యాడు. ‘ఐతే’ .. ‘అనుకోకుండా ఒక రోజు’ .. ‘మనమంతా’ సినిమాలు చేసిన ఆయన రీసెంట్ గా సాయిధరమ్ తేజ్ ను కలిసి ఒక కథను వినిపించాడట. ఇంతవరకూ తాను చేయని పాత్ర కావడంతో, వెంటనే సాయిధరమ్ తేజ్ గ్రీన్ సిగ్నల్ ఇచ్చేశాడని అంటున్నారు. ఈ ప్రాజెక్టుకు సంబంధించిన పూర్తి వివరాలను త్వరలోనే తెలియజేయనున్నారు.
